Ineqarneq pillugu ilitsersuut
Initaarnissamut aningaasalersuinissaq amerlasuunik periarfissaqarpoq, aaqqiissutillu ilinnut aningaasaqarninnullu tulluuttut pillugit paasisaqarnissannut GrønlandsBANKENip ikiorsinnaavaatit.
Kalaallit Nunaanni Namminersorlutik Oqartussat, Attaveqarnermut Avatangiisinullu Naalakkersuisoqarfik, quppersakkanik paasinartunik arlalinnik naqitertitsisimavoq, pisortat aningaasaleeriaasii assigiinngitsut pillugit nassuiaatitalinnik. Quppersakkanut attavissat ammukartumik talerpiatungaaniittumi nassaarisinnaavatit.
10-40-50 atorlugu nutaamik sanatitsineq/nutarterineq
10%-inik nammineq siulequtsiineq, 20%-inik kommunimit namminersornerusullunillu, kiisalu 50%-inik taarsigassarsisitsisarfinnit taarsigassarsineq. Taama aningaasalersueriaaseq nutaamik sanatitsinermut aamma nutarterinermut atorsinnaavoq- 10-40-50 atorlugu aaqqiineq ukiuni kingulliunerusut ingerlanerini atorneqartorujussuanngornikuuvoq.
Piginneqatigiilluni inissiaq, nutaamik sanatitsineq
7 %-inik nammineq siulequtsiineq, 33,33 %-inik namminersornerusunit aamma kommunimit, sinneruttut 25,33 %-it taarsigassarsisitsisarfimmit taarsigaassarsiarineqassapput. Piginneqatigiilluni inissianut taarsigassarsineq Kalaallit Nunaanni aningaasalersuinermi periarfissaq pisoqaanersaraat, ukiullu arlallit ingerlanerini Kalaallit Nunaanni inissianik amerlasuunik pitsaasunillu sanaartornernut iluaqutaasimalluni.
Attartortumit piginnittuunermut
Inissiami pisortat pigisaanni attartortitami najugaqaruit, inissiallu pisiarinissaanut periarfissaqaruit, aaqqiissut ”attartortuunermit piginnittuunermut” ilinnut tulluutissaaq. Aaqqiissut taanna Kalaallit Nunaanni inissiaqarnerup iluani atorneqaleraluttuinnarpoq.
Inissiamik pioreersumik pisineq
Inissiaq pisortat aningaasalersueriaasiinut ilaanngitsoq pisiariniarukku GrønlandsBANKENip aamma ikiorsinnaavaatit. Nykredit-ip suleqatigineratigut taarsigassarsisitsisarfimmit taarsigassarsititsinikkut 80 % angullugu inissiap akilerinissaanut taarsigassarsisitsineq periarfissaqarpoq. Aningaasaliissutissat sinneri nammineq siulequtsiinikkut kiisalu initaarnissamut taarsigassarsitsinikkut pissarsiarineqassapput. Periarfissaq taanna taamaallaat Kalaallit Nunaanni illoqarfinni anginerni atuuppoq.
Aningaaserivimmi siunnersortit attaveqarfigiuk, taava peqatigiilluta aaqqiissuteqassaagut.
|