Pissarsiariuminassuseq 

Kalaallit Nunaannut tamarmut aningaaseriviuvugut, ilisimavarpullu tamanna pisussaaffiliisoq.  Taamaammat siunnersuisutta pissarsiariuminassusiisa kiisalu immikkoortortatta tallimat maanna illoqarfinni annerni inissisimasut avataanni aningaasanik taarsigassarsisinnaanerup annertusartuarnerat sulissutigaarput. Allaanerusumik eqqarsarneqartariaqarpoq, taamaalilluni periutsit nutaat atorlugit pitsaanerusumik sullissisinnaassalluta. Aallaqqaammut suleriaatsini najoqqutanik nutaanik marlunnik Tasiilami aamma Aasianni iluarsiivugut, 2012-imi aamma 2013-imi misilittussaassallutigit.  Ilaatigut siunnersuisunik aalajangersimasunik attaveqarfigilersitsineq, teknologiimik atorluaaneq kiisalu isiginnaarutit atorlugit siunnersuisunik ataatsimeeqateqartitsisarneq aamma siunnersuisut tikeraartarneri amerlisinneqarnissaat. Misilittakkat ingerlaavartumik tulluussarneqassapput, neriuppugullu najoqqutat nunami sumiiffinnut allanut siammertissinnaassallutigit.