GrønlandsBANKEN-ip Inuutissarsiortunut aningaasaateqarfia aallarniutissanik
2 million koruuninik aallartinniakkanut mikinerusunut atugassanik illikartitsivoq, Kalaallit Nunaanni aningaasaqarnerup iluani alliartortitsinissamik pilersitsissutaasinnaasunik.

Ikorfartuiumalluni illikartinneqartut tassaapput aallartitsiniartunut ilaatigut annaasaqarfiusinnaagaluartunulluunniit taarsigassarsiatut tunniunneqarsinnaasut, pineqartut takutitsisimappata suliffeqarfimmik ingerlataminnik aningaasaliiffigineqarunik qaffatitsisinnaallutik.

- Inuutissarsiornermut siunnersuisooqatigiinnit tusakulasarparput, Kalaallit Nunatsinni aningaasat taaneqartutut ittut amigaatigineqartut, tassanilu Inuutissarsiornermut aningaasaateqarfik nutaaliuuteqarsinnaavoq, GrønlandsBANKEN-ip Inuutissarsiornermut aningaasaateqarfiani siulittaasoq Kristian Lennert naliliivoq, nangillunilu oqarluni:

- Neriuppugut aningaasat aallartitsiniartunut nassaarsiullaqqissunut atugassanngorlugit illikartitagut peqataasinnaassasut nutaanik suliniuteqalernissat aallartinneqarsinnaanissaannut, Kalaallit Nunaanni ineriartornermik nutaanillu suliffissaqalertitsinernik malitseqartumik. Sulilu annertunerusumik pisariaqartitsisoqartoq takussagutsigu, taava siunnerfinnut ikorfartuutissanik amerlanerusunik nassaarumaarpugut, Kristian Lennert oqarpoq.

Inuutissarsiornermut siunnersuisooqatigiit aningaasat illikartinneqartut tikilluaqquaat

GrønlandsBANKEN-ip Inuutissarsiornermut aningaasaateqarfiata aningaasat taarsigassarsiarititassat aqullugillu agguataartassavai, qinnuteqarnissamulli piukkunnaateqarsinnaasut sumiiffimminni inuutissarsiornermut siunnersuisoqatigiinnut qinnuteqaatiminnik tunniussisassapput. Tamakkulu aamma periarfissiineq tikilluaqqulluarpaat:

- Taarsigassarsisinnaanerit tassarpiaapput amigaatiginikuusagut. Aallartitsiniartorpassuit, attaveqarfigisartakkagut, namminneq aningaasatigut tunuliaqutissaatiminnik amikkittoortarput nalinginnaasumik aningaasalersuisoqalersinnaanissaq angujumallugu aallartinniakkaminnik piareersaateqarnerminni. Maannalu pineqartoq aqqutigalugu pisariaqartitaminnik periarfissaqalersinneqarput, Ulla Lynge, Sermersooq Business Council-imi pisortaasoq oqarpoq.

GrønlandsBANKEN-ip Inuutissarsiornermut aningaasaateqarfia aammalu taarsigassarsiniarsinnaaneq pillugu paasissutissiissutit uani atuakkit; www.banken.gl.

Nalunngisat

• Aningaaseriviup annaasaqaataasinnaagaluartumik taarsigassiissutai 100.000 koruuniniit 250.000 koruuninut angissuseqarut ukiullu arfinillit tikillugit taarsersuilernissamut ingerlasinnaatitaallutik.
• Taarsigassarsissagunik aallartitsiniartut inuussutissarsiornermut siunnersuisooqatigiit tunngavissiaat maleruagassiaallu naapertuuttumik inissisimaffigissavaat, soorlu assersuutigalugu ingerlatsinerminni inatsisit naapertuuttumik malissallugit, GER-/CVR normoqassallutik aammalu uppernarsarsinnaassallugu pisariaqartunik sillimmasiissusiorsimanertik.
• Aallartitsiniartoq taarsigassarsisinnaassaguni takutissinnaassavaa tunisassiaq nutaaliaasoq, soqutiginartuusoq, siunissaqartoq, avataanit pisiortornermut killilersuutaasinnaasoq imal. avammut tuniniagassaqqissuusoq.
• Taarsigassiissut pineqartoq nalinginnaasumik taarsigassiissutaasartunit eqaannerusumik ilusiligaavoq. Tassani immineq aningaasaateqarnissamut piumasarisat aammalu qularveeqqusiisinnaanermut piumasarisat sakkukinnerupput aammalu tassani arlaatigut unittoornermi utertitsinissamut atatillugu aningaaserivik immineq kingullertut aaqqiivigisassanngorluni inissittarpoq. Taamak ilisumik taarsigasseeriaaseq pineqartoq oqaatigineqarsinnaavoq tassaasutut nalinginnaasumik tarsigassap imminerisamillu aningaasaateqarnerup akornanni ittuusoq.
• Aallartitsiniartup kissaatigippagu GrønlandsBANKEN-ip inuutissarsiornermut aningaasaateqarfianit taarsigassarsiarisat ukiut pingasut qaangiunnerini ingerlatsivimmi imminerisamik aningaasaatinngorlugit nuunneqarsinnaapput, taamatut iliornikkut taarsigassarsisup pinngitsoortissinnaammagit ernianik taarsersuutinillu akilersuinissaq.