Akileraarneq pitinnagu angusat kr. 106,6 mio.-it aallaavigalugit Grønlands-BANKEN-ip saqqummiuppai ukiumut 2015-imut naatsorsuutit ukiup naanerani namminerisamik aningaasaatigisanik ukiup ingerlanerani 12,7 %-inik naleqarnerulersitsinermik imaqartut. Tamannalu 2014-imi angusanut kr. 131,4 mio.-iusunut sanilliullugu appariarnerugaluartoq, angusat naammaginartutut nalunaarutigineqarput.

Nalinik nalimmassaarinerit nalikilliliinerillu pitinnagit angusat kr. 136,8 mio.-iusut GrønlandsBANKEN-ip ukiup aallartinnerani missingersuusiussaasa 125-145 mio. koruuniusut qeqqaniipput.

Aningaserivik ukiuni sisamani ataannartumik aktiamut ataatsimut 55 koruuninik iluanaarutisitsissaaq, taamak ilisumik tamakkiisumik iluanaarutisiaritissallugit kr. 99 mio-it.

- 2015-imi ukiuni 25-ini aatsaat taamak sivisutigisumik BNP-mi ukiumut amigartooruteqartarnermit anillakaattoqarpoq. Tamanna iluarisimaarnartuuvoq, kisianni taamaakkaluartoq ukiuni pingasuni BNP-mi amigartooruteqartarsimaneq uatsinnut aamma malunnaateqarsimavoq. Niuernitsinni tunngavitta 96 %-ii Kalaallit Nunaanni ipput saniatigullu oqaluttuarisaanermi erniat aatsaat taamak appasitsigisimallutik. Taasat tamarmik uatsinnik naqisimannissimapput, taamaattumik taakku qiviarutsigit, ukiumi angusat naammagisimaarnarput, aningaaserivimmi pisortaq Martin Kviesgaard oqarpoq.

Aningaaserivimmi pisortap oqaatigisai naapertorlugit angusat pingaarnerpaamik takutippaat, sullissat inuussutissarsiornermik ingerlataqartut ataasiakkaallu aningasaqarnermikkut patajaatsuusut.

- Sullissat tamakkiisumik isigalugit nukittupput suliffeqarfiillu pissutsinut naleqqussallaqqissuullutik. Taamaattumik inuiaqatigiinni pissutsit appariartorsimanerisa ukiup ingerlanerani taarsigassarsisitsisarneq naatsorsuutigisamit annerusumik naqissimagaluaraa, ineriartornermi sullissat taarsigassarsiaanit annaasat nalikilliliinerillu killilerujussuusimapput. Tamanna nunatsinnut pitsaasuuvoq. Kisianni maqaasivarput namminersorlutik inuussutissarsiortut akornanni alliartortitsineq, neriuutigaarpulli 2015 tassaassasoq ukioq ilorraap tungaanut sangujartulerfissaq, taamallu ukiuni tulliuttuni ilorraap tungaanut ineriartulerneq takussaalissasoq, aningaaseriviup pisortaa naliliivoq.

GrønlandsBANKEN-ip nalikilliliiortuinera illikartitaalu kr. 24,8 mio.-niit 2015-imi kr. 19,4 mio-iinnanngorlutik appariarput.

Siunissamut aningaasaliineq

Ukiup naanerani taarsigassarsisitsinerit qaffarialaarsimapput, tamannalu nuan-naarutissaavoq aatsaat ukiuni sisamanngortuni taamatut pisoqaqqimmat.

- GrønlandsBANKEN-imit malugisinnaalereerparput inissianik niuerneq qaffareersoq aammalu illuliorluni sanaartornerit amerlasuut aallartittut. Taamak pisoqarnera uuttorneqarsinnaavoq aningaaseriviup suliarinnittussarsiuussinernut sillimmasiussisarnernullu atatillugu aningaasat kaaviaarnerat qiviaraanni, taakkunanimi 2015-imi qaffariarneq malunnarluarsimammat, Martin Kviesgaard oqarpoq.

GrønlandsBANKEN siunissaq upperalugu aningaasaliivoq. 2015-imi tamanna ilaatigut takuneqarsinnaavoq nutaamik immikkoortortaqarfiliornitsigut niuernitta ineriartornissaanik akisussaaffeqartussamik, Qaqortumi immikkoortortaqarfimmik iluarsaassisitsinitsinitsigut aammalu Nuummi sullissatsinnut ataasiakkaanut immikkoortortaqarfitsinnik allileralutalu nutarterinitsigut.

- Tamakkiisumik isigalugu Kalaallit Nunatsinni inissisimanerput nukittuujuvoq, aningaaseriviullu tungaaninngaanniit takusinnaalluarpagut ineriartoqqinnis-samut periarfissat suuneri, minnerunngitsumik nunatsinni illoqarfinni pingaarnerusuni. Inuiaqatigiinni aningaasaqarneq aallaavigalugu naliliigutta kissaatiginarpoq nunanit allanit aningaasalersuinerup uummaarinerulernissaa soorlu assersuutigalugu Ilulissani, Nuummilu mittarfinnik tallilerinialersaarnernut aammalu nunatta Kujataani aatsitassarsiornermut attavilersuinissamullu atatillugu. Kiisalu pisariaqarpoq pisortat aningaasalersuiniarnerini, aningaasartuutinut iluarsaasseqqinnernullu tunngasut iluini, sukangasuumik aqutsinissaq, , pisortat karsii pitsaanerusumut inisseqqullugit, ajorseriartinnagit, Martin Kviesgaard oqarpoq.

Inuiaqatigiinni ineriartornissap ilorraap tungaanut saqinnissaanik naatsorsuutiginninneq aallaavigalugu, aammali erniatigut appasitsitsinerujussuaq eqqarsaatigalugu, GrønlandsBANKEN mianersortumik naliliijumavoq 2016-imi nalinik nalimmassaanerit nalikilliliinerillu pitinnagit angusat kr. 125-145 mio.-iniinnissaannik missingersuuteqarluni.