Siunissami GrønlandsBANKEN-ip ilisarnaataa ”appa” B67-ip unamminerni kiasiini ilisarnaataalissaaq. Tamanna aningaaseriviup timersoqatigiillu peqatigiiffiata akunnerminni ukiuni pingasuni attuuttussamik isumaqatigiissusiorneratigut anguneqarpoq

- GrønlandsBANKEN-ip annertusisamik tunuliaqutsiisunngorneratigut periarfissaqarlutalu akissaqalerpugut meeqqanut inersimasunullu kissaatigisatsitut sammisassaqartitsisalernissamut. Peqatigiiffimmit ilaasortanut tamanut unammisitsinerit assigiinngitsut aaqqissuuttarpagut U3-llu tikillugit sapaatit akunneri tamaasa sungiusartitsisarluta, Christian Lauersen, B67-imi siulittaasoq oqaluttuarpoq.

GrønlandsBANKEN-ip Nuummi immikkoortortaqarfiani pisortap Mads Andersen-ip B67-imik suleqateqalerneq aamma nuannaarutigivaa.

- Kalaallit Nunaanni Tamarmiusunut ANINGAASERIVITTUT nuannaarutigaarput illoqarfimmi timersoqatigiit peqatigiiffiannik eqeersimaartumik B67-imik suleqateqalernerput. Peqatigiiffik Nuummi peqatigiiffiit nuimamersaannut ilaavoq inuppassuarnullu katersuuffiulluni. Siornatigut nuannarisatsinnik peqatigiiffik suleqatigisareersimavarput soorlu GrønlandsBANKEN-ip U14-cup-ianik ingerlatseqatigisarsimallugu tamannalu ingerlateqqikkusussavarput, Mads Andersen naggasiilluni oqarpoq.

GrønlandsBANKEN-ip B67-illu tunuliaqutsiinissamik isumaqatigiissutaat ukioq 2018 tikillugu ingerlassaaq.