Qanoq iliorlutit qaammammut aningaasanik qassinik atugassaqarnelutit naatsorsuisinnaavit? Aningaasartuutissatit isertittakkannut qanoq iliorlutit naammattusaarsinnaavigit? Qanoq iliorlutit aningaasartuutinut piareersimaffiginngissanut sillimaniarsinnaavit?

Tassaapput apeqqutit Kommuneqarfik Sermersooq-p aamma GrønlandsBANKEN-ip suleqatigiissutigilikkaminni nutaami akiortorniagaat, eqqarsaatigalugit innuttaasut overførselsindkomst-inik pisartagaqartut.

- Aqqusaallattaartarpagut innuttaasut ilaasa akissaqaraluarlutik akiitsoqalersarnerat ilaatigut aningaasaqarnerminnik naammattumik takunnissinnaassuseqannginnertik peqqutigalugu. Tamatumunnga pulasoorneq aniffigiuminaassinnaavoq, akiliutinut ernianullu akilersuisariaqalernermik malitseqalersinnasumik. Taamatut oqarpoq Suni á Dalbø, Kommuneqarfik Sermersooq-mi qitiusumik suliffissaqartitsiniarnermik sullissivimmi pisortaasoq.

2015-ip naalerneranili suleqatigiissuteqalersut pikkorissaanissat pingasut aallartippaat missingersuusiornermut, aningaasanik atorsinnaasanik naatsorsuinermut sipaagaqarnermullu tunngasunut sammisut, 2016-imi ataatsimik ilassummik pikkorissaanermik malitseqartinneqartut. Maannamut pikkorissaanerni inuit 75-it pallillugit peqataasimapput.

Aningaasaqarneq pillugu ilisimasaqarnerulerneq

Siullermik pikkorissaanermi peqataasut ilaat tassaavoq Kaleeraq Tobiassen utoqqalinermusiaqartoq:

- Siornatigut aningaaserivimmut attaveqartuusimanngilanga. Nuannerpoq ajornartorsiuleraanni periarfissanik qanorlu iliornissanik oqaluttuunneqarneq, Kaaleeraq Tobiassen oqarpoq.

GrønlandsBANKEN-imi pikkorissaanerit ingerlanneqarput inuiaqatigiinni akisussaaqataasutut suliniuteqarnermut atatillugu:

- Pikkorissaanitsinni taaneqartuni angusarpagut inuit ulluinnarni nalinginnaasumik aningaaserivimmit attaveqarfiginngisagut, taamallu kingusippallaalertinnagu attaveqarfigilersinnaasarlugit.

Tassani peqatigalugit ataasiakkaat suliffeqanngitsut , kisimiillutik pilersuisuusut imal. siusinaartumik utoqqalinersiuteqalernikuusut aningaasaqarnermut tunngasunik ilinniartittarpagut aammalu periarfissanik paasitillugit, Mads Andersen, GrønlandsBANKEN-ip Nuummi immikkoortortaqarfimmi pisortaasoq oqaluttuarpoq.

Suleqatigiinneq maannamut misiligutitut ingerlanneqarpoq, ukiorlu naappat nalilersorneqassalluni. Siunissarli isigalugu anguniagaavoq, kommunip innuttaasunik immikkut pisariaqartitsisunik ataasiakkaanik uatsinnut innersuussisalernissaa, siunertaralugu taakku GrønlandsBANKEN-imit ataasiakkaatut siunnersorneqartarnissaat.

Ataasiakkaat aningaasaqarnerat pillugu tulliani pikkorissartitsinissaq Piareersarfik-mi april-imi ingerlanneqassaaq. Pikkorissaanermi tassani anguniarneqarput inuusuttut ilinniagaqanngitsut suliffeqanngitsullu.