GrønlandsBANKEN Grønlands Erhverv aamma Nuna Advokater suleqatigalugit ulloq 17. november nal. 16 aningaaseriviup kantiinaani piginneqatigiiffiit pillugit ínatsit nutaaq 1. januar 2017 atuutilersussatut naatsorsuutigineqartoq pillugu ataatsimiititsiniarpoq.
Ataatsimiinnermi eqqartuussissuserisoq Anders Kristiansen Nuna Advokat-ineersoq maleruagassat nutaat pillugit nassuiaateqarniarpoq qitiutillugit sammillugit piginneqatigiiffinnut inatsisitaassap nutaartai aammalu maleruagassanut maannamut atuuttunut sanilliussilluni allannguutit pingaarnerusut, piginneqatigiiffiit piginnittuisalu maluginiagassaat. Samminiakkat makkuussapput:

• Piginneqatigiiffiit aningaasaateqarnissaannut piumasarisat iluini allannguutit ilanngullugu piginneqatigiiffiit ilaannakuusumik aningaasaliiffigisinnaanerinut periarfissat
• Piginneqataasut pigisallu annertussusiisa iluini assigiinngitsunik oqimaassusilersuinerit pillugit maleruagassat nutaat aammalu piginneqatassutsit piginneqataassutsillu annertussusii taaseqataasinnaatitsissutaanngitsut.
• Piginneqatigiiffiit immineq piginneqataassutsiminnik pisinissamut piginneqataanerullu annertussusianut periarfissat pillugit maleruagassat nutaat kiisalu immineq aningaasalersuisinnermik taaneqartumut tunngasut
• Aqutsinermut ilusiliussaq nutaaq
• Allaffissorluni aqutsinermut oqilisaatit aningaasaatit qaffanerinut, aningaasaatit ikilinerinut, kattunnernut avitsinernullu tunngasut
• Nutaanik aallartitsisut piginneqatigiiffiutaat (IVS) – piginneqatigiiffilioriaaseq nutaaq
• Piginneqataasut akornanni isumaqatigiissusiaasartunik annertussusiligaasumillu piginneqataanermut tunngatillugu isumaqatigiissusiaasartunik (piginnittutut isumaqatigiissutit) nutaamik iluarsaanerit.

Aaqqissuussatut ingerlanneqartussaq akunnerit 1,5-it miss. sivisussuseqassaaq ingerlaneranilu apeqquteqartoqarsinnaasassalluni.
Peqataaniartut kingusinnerpaamik ulloq 14. november uunga nalunaaqquneqarput jh@banken.gl