Sulisut juullimi tunissuteqarfigineqartussaq toqqarpaat
GrønlandsBANKEN ukioq manna meeqqat illersuisoqarfiannut MIO-mut 25.000 koruuninik tunissuteqarpoq. Aningaasat juullernissaanut atatillugu tunniunneqarput sulisut toqqaanerat aallaavigalugu, taakku amerlanerussuteqarneq tunngavigalugu aaliangiussaat ataqqillugu.

Suliniaqatigiiffiup suliniutigai nunatsinni meeqqat siunnersorneqarnissaat, piginnaatitaaffitillu pillugit paasitinneqarnissaat aammalu atukkamikkut nukittorsaaffigineqarnissaat. Meeqqallu sinnerlugit oqaaseqartartoq Aviâja Egede Lynge isumaqarpoq tunniunneqartut ingerlariaqqinnissamut iluaqutaalluarumaartut.

”Nuannaarutigaarput, GrønlandsBANKEN-imi sulisut juullimi tunniuttakkap uatsinnut tunniunneqarnissaanik aaliangiisimanerat. Tunniussat atorlugit Kalaallit Nunaanni meeqqat atugarisaannik nukittorsaaniarnerput ingerlateqqissavarput. Soorunami 25.000 koruunit immineq naammanngillat ajornartorsiutit aaqqinnissaannut, kisiannili tunniussinerup takutippaa, suliniutit aallartissimasagut, nalilittut isigineqartut, tamannalu qujamasuutigaarput.”

Aningaasat atorfissaqartinneqaqaat atorneqassallutillu ilaatigut angalanernut aningaasartuutinut annertuunut, tassa aningaasartuutinut suliniaqatigiiffiup nunatsinni siammasissumik sullisiniarneranut atasunut.

”Aningaasat tunissutigineqartut iluaqutigalugit suli meeqqat amerlanerusut nunatsinni angusinnaalissavagut, avannaaniippata, kujataaniippata, tunumiippata kitaanippataluunniit. Aningaasat pineqartut atorlugit nunatta immikkoortortaasa arlaannut ornigussinnalissaagut.”

Tassami meeqqat piginnaatitaaffii pillugit ajornartorsiutit nunatta ilaannaani aaqqinniareqarsinnaanngillat. Taamaattumik Nunarput kaajallallugu angalanissaq pisariaqartinneqaqaaq, Aviâja naqissusiilluni oqarpoq.

”Nalunngilara Kalaallit Nunaanni sumiiffeqartoq suli tikissimanngisatsinnik, meeqqat piginnaatitaaffiinik naapertuinngitsumik ingerlatsiviusunik. Taamaattumik suli suliassaqaqaagut Kalaallit Nunaat tamakkerlugu meeqqat piginnaatitaaffii pillugit qaammarsaanissamut.”

Taamak ilisumik ukiut tallimassaarlugit GrønlandsBANKEN siunertamut pitsaasumut tunissuteqarpoq. Siorna juulleriartorneranut atatillugu 25.000 koruuninik tunissuteqarfigineqarput meeqqat inuusuttullu nappaassuarmik kræft-imik eqqugaasimasut.
GrønlandsBANKEN-imit MIO tunissutisineranki pilluaqqungaarparput neriuutigalugulu tunniunneqartut Kalaallit Nunaanni meeqqat atugaannik nukittorsaaniarnermi piginnaatitaaffiilu pillugit suliniarnermi iluaqutaajumaartut.