Naatsorsuutit: Taarsigassarsisitsinerit suli amerliartorput

Kalaallit Nunaanni aningaaseriviit annersaannut ukioq aallartilluarpoq angusat, nalinik nalimmassaanerit nalikilliliinerillu pitinnagit,  kvartalimi siullermi 38,6 mio. kr.-ullutik 2017-imi kvartalimi angusat 38,1 mio. kr.-iusimallutik.  Angusat akileraarutit pitinnagit kvartalimi siullermi 34,1 mio. kr.-ullutik, 2017-mi kvartalimi siullermi angusat 38,2 mio. kr.-usimallutik.

2017-imi taarsigassarsisitsinerit annertuumik qaffariareersut GrønlandsBANKENip maanna kvartalimut angusaani taarsigassarsisitsinerit suli killeqarnerusumik annertuseqqipput sillimmasiissutillu 97 mill. kr.-nit missinginut inissillutik.

- Isumarput malillugu ukiup kvartaliisa siullianni angusagut pitsaapput. Minnerunngitsumik naammagisimaarnarpoq erniasiat ilanngaatissat ilanngaatigereerlugit qaffarialaarmata naak obligationinit erniasiaasut appariartoraluartut. Tamanna anguneqarpoq taarsigassarsiissutit qaffannerisigut taamallu erniasiat erniatigullu aningaasartuutit nikingassutasa allanngungaannginnerisigut. Soorunalumi tamanna naammagisimaarluarparput tassuuna unammillersinnaassuserput takutinneqarmat, aningaaservimmi pisortaq Martin Kviesgaard oqarpoq.

Ilanngaatissat ilanngaatigereerlugit erniasiat katikkaanni akiliutisiallu ilanngukkaanni qaffaatit 1,4 mio. kr.-ulerput angusallu 78,8 mio.kr.-ulerlutik. Tamakkiisumillu aningaasartuutit naleerutsitsinerit ilanngullugit, ukiup siulianut 2017-imut sanilliullugit, 1 mio.kr.-nik amerleriarput kr. 41,6 mio-lerlutik.

Nalitigut nalimmassaanerit kr. 1 mio.-inik annaasaqarfiupput ukiup siuliani piffissap taamatut ilinerani kr. 4 mio.-inik sinneqartooruteqarfiusimasut. 2018-imi nalitigut annaasat aningaaseriviup obligationiutaaneersuunerupput. Taarsigassarsiussat qularnaveeqqusiissutillu iluini nalikilliliinnerit annikitsumiittuarsinnarput, taamatullu inneratigut akileraaruteqartinnani angusat naammaginartumiillutik kr. 34,1 mio-pput.

-Aningaasaqarnikkut ingerlaneq pitsaasumiippoq minnerunngitsumillu Nuummi inissianik niuernerit sukkasuumik ingerlapput. Raajarniarnerlu isumalluarnartumiippoq Nuummilu, minnerunngitsumillu Ilulissani, sanaartornerit pitsaasumiillutik.  Grønlandsbankenimi maanna taarsigassiissutit iluini annaasat appasissumiipput taamatullu takuneqarsinnaalluni sullissat naammaginartumik ingerlasut. Akiliisinnaassuserlu qiviaraanni aningaasaatit pisariaqartinneqartunit marloriaammik amerlanerupput. Taamaattumik ineriartornerup naammaginartumik ingerlanissaanik naatsorsuutiginninnerup saniatigut isumalluarpugut, Martin Kviesgaard nassuiaavoq.

GrønlandsBANKENimit 2018-imi angusat 120 – 140 mio. kr.-t missinginiinnissaannik  naatsorsuutigininneq attatiinnarneqarpoq. Ukiup siuliani 2017-imi akileraaruteqarneq pitinnagu angusat 133 mio. kr.upput.