COVID-19 ukioq manna marts-imi nalornisooruteqartitsinerata nalaani GrønlandsBANKEN-ip niuernermi ineriartornera ilimagisamiit ajunnginnerusoq maanna takuneqarsinnaavoq. Tamanna ukiormut qaammatit qulingiluat siullerni naatsorsuutigisami patajaatsumik niuernermi isertitat tungaatigut naammaginartumik inissisimavoq aamma nioqquteqarfimmi navianarsinnaasut kvartalip aappaani, pingajuanilu ajunnginnerullutik.  

GrønlandsBANKEN ukioq manna qaammatit qulingiluat ingerlanerani akileraarutit ilanngaatiginagit kr. 94,0 mio.-nik angusaqarpoq, 2019-imi kr. 115,9 mio.-nut sanilliullugit. Nalinik nalimmassaanerit aamma appartitsinerit akileraarnissaq pitinnagu kr. 109,1 mio.-pput ukiorlu ataaseq sioqqullugu kr. 112,7 mio.-llutik.

2018, 2019-milu aningaasanik taarsigassiisarneq amerliartornikuullutik 2020-mi kvartali siullermi aningaasanik taarsigassiisarneq apparpoq, kvartalillu aappaani pingajuanilu amerliartoqqilerlutik. Aningaasanik taarsigassaqartitsineq aamma qularneveeqqutit 2020-mi kr. 82 mio.-nik amerlipput tamarmillu katillugit kr. 5.320 mio.-nngorlutik. Aningaaseriviup tamanna naammaginartumik nalilerpaa eqqarsaatigissagaanni qanoq COVID-19 nalorninartoqartitsiginikuunersoq.

- Kalaallit Nunaat COVID-19 nalorninartoqartitsinera piffissaq siullermi qaangerluarpaa. Sullitatta atorfissaqartitsinerat taamaaginnarpoq, inissianik, umiatsianik aamma biilinik aningaasaliisoqarpoq aamma suliffeqarfinniit aasap ingerlanerani aningaasaliisoqarpoq. Ajunngilluinnarpoq tamannalu takutippaa sullitagut aningaasaliinissaq taamaallaat annikitsumik pisariaqartissimanngikkaat, aningaaserivimmi pisortaq Martin Kviesgaard-ip oqaatigaa.

Isertitat nikerianngillat

Ilanngaatissat ilanngaatigereerlugit ernianut aamma akitsuutinut isertitat kr. 240 mio.-pput ukiorlu ataaseq sioqqullugu missingersussagaanni tamanna allannguuteqanngilaq. Isertitat iluanaarutissaniit aamma obligationinik erniaanit appasinnerusunit sunnernerlunneqarput taavalu piffissap ilaani suliaqartitsinerit aamma aningaasanik taarsigassiineq appasinnerulaarlutik. Aningaasanik niuerfiusumi ernianik iluanaarutissartaqanngitsumi sullitat uninngasuutaaniit ernianik iluanaarutissartaqanngitsunik isertitanik naligiissitsipput.

2020 kvartalip pingajussaanni ataatsimut akileraarutit atorunnaarsitsinerillu kr. 133,9 mio.-pput ukiorlu ataaseq sioqqullugu kr. 131,7 mio.-llutik.

- Ukioq nutaamut iseqqaaratta naatsorsuutiginikuugaluarparput ukioq manna angusaqarluarumaarluta, COVID-19-ilu peqqutigalugu allannguuteqanngitsumik angusaqarpugut akueriuminartumik, taavalu aningaasartuutit naammaannartunik qaffakkiartuaarlutik. Tunngaviusumik ingerlatitsineq suli ingerlalluarpoq taamaakkaluartorlu taanna piffissaq takkuttussami suli ukkatarissavarput, Martin Kviesgaard oqarpoq.

Nalinik nalimmassaanerit aamma appartitsinerit allanngunngillat

Nalinik nalimmassaasoqarnermi aningaaseriviup pappiliaatai aningaasanik nalillit iluanaaruteqarput kr. 2,6 mio.-nik ukiumullu qaammatit qulingiluanut katillugit kr. -4,7 mio.-llutik. Kvartalimilu siullermi sullitat aningaasaliiffigitinnermi peqataaffiata annertussusia COVID-19 nalornisooruteqartitsinera peqqutigalugu appartitsinernik kinguneqarpoq. Aningaaserivillu COVID-19 toqqaannartumik toqqaannanngitsumillu kingunerisaanik annaasaqarnissamut kr. 20 mio.-nit missaani immikkoortinneqarnikuupput. Aningaasaliinermi aamma qulakkeerinnermi appartitsinerit kr. 3,8 mio.-nik qaffapput ukiorlu ataaseq sioqqullugu kvartalit pingasut siullerni kr. 10,4 mio.-llutik, unalu kvartalimi appartitsinerit taamaallaat kr. 0,5 mio.-llutik.

- Nunatsinni takornariartitsillutik inuussutissarsiortut annerusumik eqqugaaqqapput, inuiaqatigiinni suliffissaaleqineq nikerianngilaq aamma inuussutissarsiorlutik immikkut suliaqartuni ingerlalluarput, taamaammat nioqquteqarfimmi navianarsinnaasut akueriuminarput, Martin Kviesgaard oqarpoq.

Ukiumut naatsorsuutigisat qaffanneqarnikuupput

Aningaasaatit procentii 23%-iupput tamannalu akiliisinnaanissamut pisariqartitsineq 11,6%-iusoq iluarisimaarnartumik qaangerlugu inissisimalluni.

Fondsbørs-imut nalunaarummi 20. oktober 2020-meersumi ukiumut naatsorsuutigisat akileraarutit ilanngaatiginagit kr. 100-120 mio. missaani inerneqarnissaa nalunaarutigineqarnikuusoq kr. 110-125 mio. missaanut allanngortinneqarnikuuvoq tamannalu taamaaginnarpoq.