GrønlandsBANKEN-ip Inuussutissarsiornermut Aningaasaateqarfiata ullumikkut 25. november aningaasaateqarfiup aallarniisunut nersornaasiuttakkani Anders Lykke Laursen, Nuuk Water Taxi-mut aamma Jesper Øraker, Greenland Escape-mut tunniuppaa.

Inuussutissarsiornermut Aningaasaateqarfiup ukiuni arlalinni inunnut imaluunniit suliffeqarfinnut aallarniisumut, atuunnermini immikkut piumassuseqartumut, pimoorussisumut kiisalu maluginiagassamik suliaqartumut nersornaatigisartakkani tunniuttarpaa, piffissallu ingerlanerani nersornaammik tigusisut nunatsinni sumiiffinnit assigiinngitsuneersuullutillu inuussutissarsiorfinnit assigiinngitsuneertuusimapput.

Inuussutissarsiornermut Aningaasaqarfiup siulersuisuisa Aallarniisunut nersornaat 2020 marlunnut tunniunneqassasoq aaliangerpaat, Anders Lykke Laursen, Nuuk Water Taxi-miit aamma Jesper Øraker, Greenland Escape-miit.

Nersornaammik tunniussinermut ilaapput aningaasat kr. 25.000, nersornaaserneqartut avitassaat.

GrønlandsBANKEN-ip Inuussutissarsiornermut Aningaasaateqarfiata siulittaasuata, Kristian Lennert-ip toqqaaneq tunngavilersorpaa:

”Inuussutissarsiornermut Aningaasaateqarfiup Aallarniisunut nersornaataanik 2020-mi tigusisussatut Anders Lykke Laursen aamma Jesper Øraker toqqarneqarneranut tunngavilersuutaavoq takornariartitsinermi nutaaliornerat.

Anders Lykke Laursen Inuussutissarsiornermut aningaasaateqarfimmiit 2020-imi aallarniissumut nersornaasiissutaanik tunineqarpoq aallarniisutut Greenland Water Taxi-mi misigisassanik assigiinngitsunik pilersitsinnikuugami. Maani Nuummi Nuuk Water Taxi-ip ilisarnaatigilluagai imarmi angallatit sungaartut ukioq naallugu angalasarput, takornarianullu Nuummi kangerluit misigisassarfiornissaanut periarfissiillutik. Nuuk Water Taxi-ip sumiiffimminni ilisimasatik atorlugit takornariat pinngortitamut qanillisittarpaat. Aquttup takornariallu qanimut attaveqarnerat iluatsillugu Nuuk aamma nunarput pillugu aquttut takornarianut naleqartumik oqaluttuanik aliikkusersortarpaat. Anders Lykke Laursen-ip takutippaa angallassinermi aamma takornarianut misigisaqartitsinermi nutaanik isumaliorneq suliffeqarfimmik pilersitsisinnaasoq, misigisassanillu nutaanik isumassarsisarluni.

Jesper Øraker Inuussutissarsiornermut aningaasaqarfimmiit 2020-imi aallarniisumut nersornaasiissutaanik tunineqarpoq aallarniisutut takorniariartunut nioqqutissamik nutaamik misigisaqarluartitsigami taavalu immikkut takornariartunut tulluarsakkanik iluarsiissutinik Greenland Escape-miit neqerooruteqartarami. Greenland Escape takornariartunut umiarsuit takornariartaatineersuniit, VIP-nut immikkuullarissunik misigisaqarusuttunut attaveqarfiuvoq.

Jesper aamma Anders takornarianut neqeroorutinik nutaanik pilersitsipput, takornarialerisut akornanni suleqatigiinnerulerput tamarmik iluaqutigisaminnik, takornarianut neqeroorutit takornarialerisullu piginnaasaat takornariartunut ataatsimoortumik misigisaqartitsinissamut atorluaallutik. GrønlandsBANKEN-illu Inuussutissarsiornermut Aningaasaqarfianit isumaqarpugut suliamut tunniussimaneq sumiiffimmi takornarialerinermut ineritortitsisuusoq, allanullu isumassarsisoq nersorneqartussaq.”