Naalagaaffeqatigiinni aningaaseriviit allat assigalugit GrønlandsBANKEN inuinnaat ingerlaannartumik ulluinnarlugulu nuussisinnaanerat unitsippaa. Tassungalu atatillugu aamma inuinnaat akornanni nuussinernut 25.000 koruuninik annerpaaffissaliilluni. Taamaalilluni aningaaserivik peqquserluuteqarnernik akiuiniarnerminut iliuuseqaqqippoq.  

Mailit oqarasuaatillu aqqutigalugit peqquserluuteqarnerit amerliartorput, GrønlandsBANKEN-illu Allaffissornermut pisortaata Carsten Th. Pedersen-ip ingerlaannartumik ulluinnarlugulu nuussisarnerit unitsinneqarnerat peqquserluuteqartarnerup akiorneqarneranut ilaasutut isigaa. 

• Inuit aningaasaatiminnik mailikkut imaluunniit oqarasuaatikkut, phishing-imik vishing-imillu taaneqartartutigut, tillinniarfigineqariaraluartut amerliartortut takusarpavut. Sullitavut illersorniarlugit ingerlaannartumik ulluinnarlugulu nuussisarnerit unitsinniarlugit aalajangerpugut. Pingaartumik utoqqaat ulorianartorsiorput, peqquserlunnianit saaffigineqartaramik. Inuinnarnut atuuttunik nuussinernik taama ittunik unitsitsinitsigut peqquserlunniat killilersorsinnaavavut.

Aningaaserivinni allani sullitanut ingerlaannartumik ulluinnarlugulu nuussinernut taamaallaat tamanna atuuppoq. GrønlandsBANKEN-ip sullissaasa akornanni nuussinerit tamatigut ingerlaannartumik nuussinertut pisarput.

Inummut allamut nuussinerit 25.000 kr.-inik annerpaaffilerneqarput

Ingerlaannartumik ulluinnarlugulu nuussinernik unitsitsinerup saniatigut aamma aningaaserivik inuinnaat akornanni inummut allamut nuussinernut 25.000 kr.-inik annerpaaffiliivoq. Taamatut iliuuseqarnermigut aningaaseriviup annaasaqaataasussaagaluit annikillisissinnaavai amerlasuutigullu sullitatta aningaasaataat annaassinnaassallutigit

• Aappannut aningaasanik 25.000 koruunit sinnerlugit nuussisinnaavutit, kisianni inunnut illoqatiginngisannut taamaaliorsinnaanngilatit, Carsten Th. Pedersen oqaluttuarpoq nangillunilu,

aningaasat annertuut sullitatsinnit salloqittaalluni nuunniarneqaraluartut unitsissinnaavavut. Pisariaqarporli sullitatta aningaaserivik atassuteqarfigisassagaa suleqatigalutalu. Inuinnaat 25.000 koruunit sinnerlugit nuussinissaminnik pisariaqartitsissagunik, Netbankikkut siunnersortiminnut attaveqarsinnaapput taamaalillutillu nuussineq akueritillugu, taama naggasiivoq Carsten Th. Pedersen.

Aningaaseriviup oqartussallu illit NemID-t imaluunniit paasissutissat kontonnut tunngasut qaqugukkulluunniit piumanavianngilaat

Pingaartumik utoqqaat inunnit politiiusaartunit, oqartussaneertuusaartunit imaluunniit aningaaserivimminngaanneersuusaartunit sianerfigineqartarsimapput aningaasanillu tusintilippassuarnik salloqittagaallutik tilliffigitittarsimallutik. Taamaattoqannginniassammat akiliutip kisitsisitai imaluunniit NemID-mut isissutissat oqaatigisannginnissaat namminerlu nuussarinngisanut tunngasunut sms-ikkut akuersisannginnissaat aningaaserivimmit siunnersuutigaarput. Eqqaamasassaq pingaartoq tassaavoq aningaaseriviup imaluunniit oqartussat paasissutissat taakku mailikkut imaluunniit oqarasuaatikkut qaqugukkulluunniit apeqqutiginavianngimmatigit.

Aningaaserivimmi sullitanut inuinnarnut taamaallaat iliuuserineqartut uku atuupput. Sullitavut inuussutissarsiortut periarfissaat allanngunngillat, taakkuli aamma anginerusumik akisussaaffeqartitaapput.

Atassuteqarfissaq: pfr@banken.gl Peter Fleischer Rex, Attaveqatigiinnermut nittarsaassinermullu siunnersorti