Nunatsinni bankit anginersaata kiisalu Elite Sport Greenland (ESG)-p ukiorpassuarni suleqatigiinnerat ingerlaqqippoq. Isumaqatigiissutip atsiorneratigut nunatsinni timersornermi pikkorinnerpaat ukiuni marlunni tulliuttuni bankimit aningaasaliiffigineqarnissaat qularnaarneqarpoq.

Elite Sport Greenland-imi siulittaasup, Nikolaj Christoffersen-ip, suleqatigiinnerup nangeqqinneqarnera nuannaarutigaa. 

- GrønlandsBANKEN-imik suleqateqarnitta nangeqqinneqarnera uagut (ESG)-mi ima paasivarput suli pitsaasumik suliaqartugut, Kalaallit Nunaanni timersornermi pikkorinnerpaanik ineriartortitsinerput eqqarsaatigalugu. Periusissiornikuuvugut, taannalu maleqqissaarparput, naallu corona pissutaalluni matoqqasoqartarnikuugaluartoq, ESG-mi, timersortartut pikkorivissortut piukkunnaatillillu pitsaasumik ineriartornerat takusinnaavarput. Tassani suli GUX-imi timersornermik sammiveqarluni ilinniarneq suliassaqarfiit angisuut ilagaat, tassanilu inuusuit akornanni timersornikkut atuagarsornikkullu ineriartorluartoqarpoq, Nikolaj Christoffersen naggasiivoq.

GrønlandsBANKEN-imi aqutsisoqarfimmi pisortap Carsten Th. Pedersen-ip suleqatigiinnerup nangeqqinneqarnera nuannaarutigaa, erseqqissarlugulu isumaqatigiissutip sivitsorneqarneranut pissutaasoq ESG-p pikkorivissortunik piukkunnaatilinnillu sullissilluarnera.

- ESG tassaavoq Kalaallit Nunaanni piukkunnaatilinnut timersornermilu pikkorinnerpaanut katersuuffiusoq, ESG-miullu suliaat kusanarput. ESG-p periusissiaani pilersaarutit ersaripput, assersuutigalugu timersornermi pikkorinnerpaanut kiisalu piukkunnaatilinnut, GUX-imilu timersornermik sammiveqarluni ilinniarnerup aaqqissuussaasumik ineriartortinneqarnera takusinnaavarput. Tamanna bankimit soorunami tapersersorparput, taama oqarpoq Carsten Th. Pedersen.

ESG aamma GrønlandsBANKEN 2013-imili suleqatigiilerput, isumaqatigiissullu nutaaq 2023-p naanissaata tungaanut atuuppoq.