2022-mi kvartalimi siullermi aningaaseriviup akileraaruteqareernani kr. 29,6 mio.-inik angusaqarpoq, 2021-mi kr. 40,2 mio.-inut sanilliullugu. Tunngaviusumik ingerlatsineq kr. 3,8 mio.-inik pitsanngoriarpoq kr. 40,9 mio.-inut, aningaaseriviulli obligationini pigisaani naliusup appariarnerata kingunerisaanik, negativiusumik naliusup nalimmassarnerani kr. 10,7 mio.-inik angusat appariartinneqarput. Aningaaseriviup taarsigassarsiarititaani annaasaqaatit nalikilliliinerillu 2021-mi kvartalimi siullermi kr. 0,9 mio.-init kr. 0,7 mio.-inut appariarput. 

GrønlandsBANKEN-imi kvartalimi siullermi taarsigassarsiarititat qularnaveeqqusiinerillu kr. 126 mio.-inik amerleriarput, kr. 5,7 mia.-inngorlutik.

- Ukiup aallartinnera pitsaasuuvoq, kiisalu inuinnaat aamma inuussutissarsiornermi sullitat sammisaani ingerlalluarneq pitsaasuuvoq. Pingaartumik inuussutissarsiornermi sullitat ulappupput, uatsinnullu tamanna sunniuteqarpoq, taama oqarpoq aningaaserivimmi pisortaq Martin Kviesgaard

Erniat aningaasallu naleerukkiartornerisa kingunerisaanik Grønlandsbanken-ip unammilligassat suli annertunerusumik maluginngilai.

- Kalaallit Nunaata realkreditimut taarsigassarsiinermi erniat annertusiartornerat malugaa, kisianni inissianik piginnittut taarsigassarsinermi aalajangersimasumik erniaqarnermik illersorluagaapput, taamaattumik pingaarnertut siullermik pisisut malugisinnaavaat, inissiamut aningaasartuutinut illuartitsinerulaarnissaq, immaqalu inissiamik minnerulaartumik pisinissaq.

- Akit qaffakkiartorneri atuinermi kiisalu sanaartornermi malugineqarsinnaapput. Maannamulli iluaqutigaarput nukissiornermi akit Kalaallit Nunaannut suli anngutinnginneri. Sunniuteqaat taamaattumik nunanut allanut sanilliullugu suli taama annertutiginngilaq, kisiannili suli siusippallaarpoq oqaatigissallugu qaqugu maani sunniuteqalissanersoq imaluunniit sunniuteqalissanersoq. Maannamut sanaartornermi akit kiisalu pisiassat akii qaffakkiartortut ersarinnerpaapput.

Aningaaserivimmi pisortap erseqqissarpaa, sinaakkutinik pitsaasunik pilersitsisoqarpat inuiaqatigiinni pitsaasumik ineriartornissamut periarfissaqartoq.

- Siumut qiviarutta takornariaqarnermi suliassaqarfimmi periarfissat kiisalu sinerissap qanittuani aalisarnermi aaqqisuusseqqinneq taakkuupput periarfissiisinnaasut. Peqatigitillugu pingaaruteqarput inissianik sanaartornerit kiisalu inissianik nutarterinerit, pingaartumik illoqarfinni annerni.

Aningaasartuutit uninngasut

Naatsorsuutini aningaasartuutit ukiumi kvartalimi siullermi allanngunngillat kr. 49,2 mio.-iullutik.

- Siunissaq eqqarsaatigalugu soorunami qaffariarnermik takusaqassaagut, kisiannili maannakkut tamatumani uninngasoqarnera pitsaasuuvoq. Sullitarpassuatsinnut pitsaasumik siunnersuinermik tunniussaqarniarluta kiisalu IT-kkut aaqqiissutinik eqqortunik peqarniarluta sulisut kiisalu IT pillugit suli aningaasaliisassaagut.

Nalikilliliinerit annaasallu annikitsut

Grønlandsbanken-ip taarsigassarsiarititanut annaasai nalikilliliinerilu, 2021-mi piffissami tassani kr. 0,9 mio.-iniik, maanna kr. 0,7 mio.-iinnanngorlutik appariarput. Tamanna 2020-mi kvartalimi siullermi Covid-19-ip sunniuteqarnerujussuanut akerliuvoq, taamani kisitsisit kr. 9,2 mio.-iniipput.

- Nalikilliliisarneq annikippoq, inuussutissarsiortullu kiisalu inuinnaat aningaaserivimmi taarsigassarsiaqartut akornanni qajannaatsumik inissisimanermik takussutissiilluni.

- Siunissaq qaninneq isigigutsigu, pingaartumik takornariaqartitsinermik suliffeqarfiit kiisalu hotelit siunissaat qaammariartuinnarpoq, ataatsimulli tamaat isigalugu suliffeqarfiit amerlanerpaat kisitsisinik kusanartunik takutitsipput, taama oqarpoq Martin Kviesgaard.

Ineriartornissamut inissaqartitsineq

Aningaasaatit procentiat 24,4%-iuvoq, taamaasillunilu akiliisinnaanissamullu pisariaqartut naatsorsorneqartut 10,7%-iusut ilorrisimaarnartumik qaangeqqallugit.

- Nalilerparput, Kalaallit Nunaanni aningaaserivimmik qajannaatsumik peqarnissaq pingaaruteqartoq, peqatigitillugulu ineriartorneroqqinnissamut suli inissaqassaaq, taama oqarpoq Martin Kviesgaard.

GrønlandsBANKEN-ip 2022-mut tamarmut naatsorsuutai allanngunngillat, akileraaruteqareernani kr. 120-140 mio.-it angusatut naatsorsuutigineqarlutik, kisitsit tamanna 2021-mi 158,9 mio.-iusoq.