2021-mi corona peqqutigalugu unammillernartoqarsinnaagaluartoq GrønlandsBANKEN-imi ulapinneqarpoq tamannalu ullumi saqqummiunneqartumi naatsorsuummi takuneqarsinnaavoq. GrønlandsBANKEN 2021-mi akileraarnissaq pitinnagu kr. 158,9 mio.-nik angusaqarpoq 2020-milu kr. 130,9 mio.-llutik. Aningaaseriviup oqaluttuarisaani ukiut 55-ni aatsaat taamak annertutigaaq.

GrønlandsBANKEN 2021 aallartimat ilimaginikuugaluarpaat ukioq naappat kr. 115-135 mio.-nit missaani inerneqarumaarluni. Taamaammat aningaaseriviup angusaq tulluusimaaritigaa. Aningaaserivimmi pingaarutilinnik niuernermut tunngasunik aningaasarsiornikkut siuariartuuteqarpugut, annaasat annikitsut taavalu aningaasat nalingi iluanaaruteqarneri annerusumik isertitaqarnermi peqqutaapput.

”Corona peqqutigalugu ajornartoorneq nunatsinni malunnartorsuunngilaq. Akiliisinnaajunnaartoqarnikuunngilaq, nunatta aningaasaqarnera allivoq aamma sakkortuumik nappaammut eqqugaasut amerlanngillat. Brancheqarpoq tamaviaarnikunik taavalu siumukarnissamut pisariaqartitsisut, kisianni ajornartoornermi aqutsinertaa tamakkerlugu isigissagaanni ajunngitsorujussuuvoq.” aningaaseriviup pisortaa Martin Kviesgaardip oqaasertalerpaa.

GrønlandsBANKEN ukiuni arlalinni taarsigassarsisitsinera siuariartornikuuvoq. Sanaartorneq ingammik malunnaataanikuuvoq, 2021-milu sanaartornerit amerlasuut matunikuullutik. Tamannalu peqqutigalugu aningaaserivik realkredit-ikkut aningaasaliinermi ingerlateqqitai aatsaat taamak amerlatigipput kr. 1,2 mia.-nillu naleqarlutik, aningaaseriviup realkredit-ikkut aningaasaliinermi ingerlateqqitai katillugit manna kr. 4 mia.-nik naleqarput.

”Aningaaserivimmi ulapinnikuuvugut, ingammik illoqarfinni siuariartortuni. Nunattalu ineriartornera peqataaffigisinnaagatsigu tulluusimaarutigaarput, sullitagut qanimut suleqatigalugit. Siumut isigissagaanni tamanna neriulluarnarpoq.” Martin Kviesgaard oqarpoq.

GrønlandsBANKENip taarsigassarsisitsineri taavalu qularnaveeqqutit tamakkerlugit kr. 5,6 mia.-pput, niuernermilu isertitat katillugit kr. 13 mia. missaaniipput tassanilu realkreditikkut aningaasaliinermi ingerlateqqitat ilanngullugit.

Tunngaviusumik ingerlatsineq qaffakkiartorpoq

Aningaaseriviup tunngaviusumik ingerlatsinera pitsanngorsimavoq kr. 143,6 mio.-niit 2020-mi kr. 149,2 mio.-nut 2021-mi.

Isertitat aningaasartuutiniit 2021-mi amerlanerulerput, pingaartumillu sulisut amerlineri aamma qarasaasiakkut ineriartortitsineq aningaasartuutaalluni. Sulisoqarnerup tungaatigut aningaasartuutit qaffanneqarneri naatsorsuutaapput siuariartorneq taavalu inatsisinik malisitsinissaq qulakkeernissaa peqqutaallutik.

”Tunngaviusumik ingerlatsineq ingerlalluarpoq tamannalu sulisunut, siunnersuinissamut atortorissaarutinut aamma sullitanut tulluarsakkanut atortorissaarutinut ineriartortitsinissamut periarfissivoq.”

Annaasat annikitsut taavalu pappilissat aningasanik nalillit iluanaaruteqartut

Appartitsinerit aamma immikkoortitsinerit 2021-mi kr. 1,5 mio.-pput 2020-milu kr. 12,8 mio.-llutik.

”2020-mi Covid-19 aallartimmat sullitatsinnut annaasagut annikipput, 2021-milu tamanna annikinneruvoq. Tamanna takutippaa nunatsinni suliffeqarfiit inissisimalluarput aningaasaqarnerallu aarlerinarnani. Suliffeqarfiit piffissap ingerlanerani tulluarsartarsimanerat kusanarpoq.” Martin Kviesgaard oqarpoq. 

Naatsorsuutini aningaasat nalingi taavalu aningaaseriviup pappiliaataani aningaasanik nalilinni ingerlalluarsimapput 2021-milu kr. 11,2 mio.-nik isertitaqartitsimallutik 2020-mut sanilliullugit 0,1 mio.-llutik.

Aktiaatilinnut iluanaarutit

Aningaaseriviup angusaq tulluusimaarutigaa akitiaatilinnullu aktia ataasiakkaarlugit kr. 40-nik iluanaarutissartaqarpoq, ukioq kingulleq aktia ataasiakkaarlugit kr. 25-simavoq. Taamaalilluni aningaaseriviup inernerup akileraarnerup kingorna 54%-ia aktiaatilinnut iluanaarutissanngorpoq aamma aningaaseriviup akiliisinnaassuseqarnera 24,4%-mut qaffalluni.

”Aktiaatilinnut iluanaarutissartaqarpoq taamaalillutalu nunatta ineriartornissaanut aningaasaleeqataanissatsinnut peqataalluarsinnaalluta.” Martin Kviesgaard oqarpoq.

2022-mi ineriartorneq

”Nunarput siunissami Covid-19-imiit sunnertippallaanngitsoq soorlu takorloorsinnaariartuaarlugu, ajoraluartumilli Ukrainemi sorsunneqarpoq. Nunarput Ukrainemiit aamma Raslandimiit ungasikkaluarluni ullut makku takussavarput nunatsinnut, sullitatsinnut, aningaaserivimmullu qanoq sunniuteqassanersoq. Maannakkoqqissaaq nakkutigaarput nunatsinni internetikkut akornusiinissamut navianarsinnaasut taavalu nunatta Ruslandimut eksportia, aningaasaqarnermi nioqquteqarfimmi erniat taavalu aningaasat nalikilliartornissaanut nalorninarsinnaasut.”

”Ukiuni qanilliartortuni nunatsinni, nunattalu avataani pissutsit ineriartornermut sunniuteqartoqarsinnaavoq. Mittarfinnik sanaartorneq takornariaqarnerup ineriartorneranut pingaaruteqassapput tamannalu sulissuteqarnerup tungaatigut sunniuteqarnissaa qilanaaraarput, ineriarornerlu peqataaffigerusupparput. Sanaartornerlu ukiuni qanittuni annertussamaarpoq. Minnerunngitsumillu neriuutigaarput aalisarnermi kinguneqarluartussamik aaqqissuusseqqinneq takussagipput, uagutsinnut aalisarnermi aningaasaliinissaq oqinnerulerniassammt” Martin Kviesgaard-ip naggaserpaa.

Aningaaseriviup naatsorsuutigaa 2022-mi akileraarnissaq pitinnagu angusat kr. 120-140 mio.-it missaaniikkumaartut.

Ukiumoortumik nalunaarut 2021 uani atuaruk.