Niuerfimmi aarleritsasimaartoqaraluartoq niuernernerit malunnartumik annertusinerat

Nunarsuarmi aarleritsasimaartoqaraluartoq kiisalu aningaasat naleerukkiartuinnaraluartut erniallu annertusiartuinnaraluartut Kalaallit Nunaata aningaasaqarnera qajannaatsuuvoq. Qajannaatsuunera pingaartumik aningaaseriviup 2022-mi ukiumoortumik nalunaarutaani takuneqarsinnaavoq, niuernermi immikkoortuni tamangajanni malunnartumik siuariartoqarsimaneratigut.

”Nunarsuarmi piffissami aningaasaqarnikkut nalorninartorsiorfiusumi aarleritsasimaarfiusumilu, toqqissisimanarpoq takusinnaallugu Kalaallit Nunaat aamma GrønlandsBANKEN aqutsisinnaasut. Aningaaseriviup 2022-mi uuttuutini amerlanerpaani siuariartorneq misigaa, tamannalu aningaaserinermi niuerfinni ineriartornermut minnerunngitsumillu Kalaallit Nunaanni ineriartornermut takussutissaavoq.” –Martin Kviesgaard, GrønlandsBANKEN-imi Aningaaserivimmi pisortaq oqarpoq

GrønlandsBANKEN-ip taarsigassarsiaminut nalikilliliineri suli appasipput, aningaasalli nalinginut iluarsiissutit negativiusut angusanik appartitsipput.

GrønlandsBANKEN 2022-mi suli akileraaruteqarnani inernerusut kr. 109,1 mio. anguai, 2021-mi kr. 158,9 mio.-iusut. Inernerusut oktober 2022-mi missingiutit kukkunersiorneqarnikut inerusussatut kr. 90 – 120 mio.-iusut iluanniipput.

Aningaaseriviup tunngaviusumik ingerlatsinerani aningaasat nalinginut iluarsiissutit aamma nalikilliliinerit sioqqullugit inernerisat 2021-mi kr. 149,2 mio.-init, 2022-mi kr. 153,0 mio.-inut pitsanngoriarput.

Aningaaseriviup oqaluttuarisaanerani taarsigassarsiarititat qaffasinnerpaat

Pingaartumik taarsigassarsiarititat ineriartornerat aningaaseriviup iluarisimaarpai. Taarsigassarsiarititat kr. 570 mio.-inik qaffariarput kr. 4.354 mio.-inngorlutik, aatsaallu taama aningaaseriviup oqaluttuarisaanerani qaffasitsigillutik.

”Inernerusoq tamanna niuernermi nukittuumik inissisimanermeerpoq, pingaartumillu inuussutissarsiornermi sullitagut peqqinnartumik niuernermik ingerlataqarput aningaasaleerusussuteqarlutillu.” aningaaserivimmi pisortaq oqarpoq.

Sanaartornerujussuup kiisalu minnerunngitsumik illunik niuernerup qularnaveeqqutit amerlassusaasa annertusinerannik kinguneqarput, 2022-llu naanerani kr. 1.934 mio.-iullutik, 2021-mi kr. 1.781 mio.-iusut.

Erniat negativiusut atorunnaarput

Ilanngaateqareerluni ernianit isertitat 2022-mi kr. 9,1 mio.-inik qaffariarput kr. 234,2 mio.-inngorlutik. Qaffariarnermut annikitsumut ilaatigut pissutaavoq, 2022-p naalernerani aatsaat taarsigassarsiarititat qaffariarmata. Erniat positiviusut uternerannut peqatigitillugu, 2022-p naalernerani ilanngaateqareerluni erniat ersarissumik pitsanngoriarfiupput.

Taarsigassarsiarititani nalikilliliinerit killeqartut

Inuiaqatigiit sullitallu aningaasaqarnerat qajannaatsuusoq takuneqarpoq. Tamatumani 2022-mi nalikilliliinerit unerartitallu kr. 4,5 mio.-iupput, 2021-mi kr. 1,5 mio.-iusut. Aqutsinermut sillimmatit maanna kr. 42 mio.-iupput, taakkununnga ilanngullugit aningaasaqarnermi pissutsit sunniutissaannut, aninagasat naleerukkiartornerinut kiisalu erniat qaffakkiartornerinut aningaasat.

“Sullitat nukittuumik inissisimasut takusinnaavagut, aammali aningaasat naleerukkiartornerisa kingunerisaanik nalorninartorsiorsinnaaneq isumagisinnaajumallugu aqutsinermi missingiutinut nalikilliliinerit annertusilaarnissaat aalajangerparput”, Martin Kviesgaard oqarpoq

Erniat qaffakkiartortut aningaaseriviup obligationiini nalimi annaasanik annerusunik nassataqarnikuupput. Aningaaseriviup isumaginnittoqarfimmi aktiai kiisalu nunat allat aningaasai suli pitsaasumik tapertaapput. Aningaasat nalinginut iluarsiissutit 2022-mi kr. 39,4 mio.-inik annaasaqarfiupput, 2021-mi kr. 11,2 mio.-inik iluanaarfiusimasut.

Aningaasaatini nanertuusiinerit alliartorput

Pingaartumik taarsigassarsiarititat qularnaveeqqutillu 2022-mi malunnartumik alliartorsimapput, aninagaseriviullu aningaasaataasa ukkatarinissaat pisariaqartinneqarpoq, Martin Kviesgaard oqarpoq.

” SIFI-institutitut immikkut pisussaaffigaarput isumaliutigissallugu, aninagaserivik maanna siunissamilu qanoq aningaasaqassanersoq. Pingaaruteqarluinnarpoq, inuiaqatigiinni inissisimanerput eqqarsaatigalugu, Kalaallit Nunaanni ineriartortitseqataaginnassagutta aningaasaqarnikkut nukissaqartariaqartugut.”

Iluanaarutit 2023-llu ingerlalluarnissanut ilimasaarineq

Aningaasaatitigut tunngaviit qajannaatsuutillugit aktiamut kr. 20, ukiumi angusat 36%-erisaat iluanaarutaassasoq inassutigineqarpoq.

Taarsigassarsiarititat qaffakkiartornerisa kiisalu erniat positivinngoqqinnerisa kingunerisaanik, GrønlandsBANKEN-ip naatsorsuutigaa 2023-mi suli akileraaruteqarnani angusat kr. 130 – 170 mio.-iussasut.