2024-mi kvartalit pingajuanni GrønlandsBANKEN-imi inernerusut annertuumik siuariartut

GrønlandsBANKEN ukiumi qaammatini siullerni qulingiluani suli akileraaruteqarnani inernerusut 193,6 mio. kr.-it piviusunngortippai, 2023-mi piffissami tassani 170,8 mio. kr.-iusunit qaffariarsimallutik.

”Ukiumi qaammatini siullerni qulingiluani angusatta ersersippaat aningaasat nalinginut iluarsiissutit positiviusut aamma taarsigassarsiarititatta qaffasissut attatiinnarnerisa akuliunneri. Pitsaalluinnarpoq unammillersinnaassutsikkut taama inissisimalluartigigatta, aamma suleqaterpassuagut ulapaavissornikuupput.” taama oqarpoq Aningaaserivimmi pisortaq Martin Kviesgaard. ”Aammali takuarput, erniat qaffasinnerusut ukioq manna taarsigassarsiniartarnermut unikaallatsitsisimasut, sullitarpassuagullu ukiumi immikkoortumi siullermi nutaanik aningaasaliinissamut atatillugu utaqqigallarsimapput.”

Taarsigassarsiniartarneq appasinnerugaluartoq GrønlandsBANKEN-ip taarsigassarsiat qaffariartissimavai kiisalu ilaatigut obligationinik tigummisanut qaffasinnerusumik erniaqarnermi ernianit akiliutinillu isertitat 40,8 mio. kr.-inik qaffariarsimapput, 355,9 mio. kr.-inngorlutik, ukiumi kingullermi piffissamut tassunga sanilliullugu. Aningaaserivik ukiup kingulliup ingerlanerani taarsigassarsiarisani 7 %-imik aamma aningaaserivimmiittuutini 10 %-imik siuariarnermik misigisaqarpoq.

Aningaasat nalinginut iluarsiissutit kusanartut aamma aningaasartuutit qaffakkiartortut

Aningaasat nalinginut iluarsiissutit positivimik tapersiissuteqarput ukiumi kvartalini pingasuni siullerni 22,6 mio. kr.-inik iluanaaruteqartitsillutik, ukioq kingulleq piffissami tassani 19,8 mio. kr.-iusunut sanilliullugu. Siuariarneq taanna ilaatigut ernianik atoruminartunik, aningaaseriviup obligationiinut pitsaasumik sunniuteqarsimasumik pissuteqartinneqarpoq.

Aningaasartuutit eqqaassagaanni aningaasartuutit tamarmiusut nalikilliliinerit ilanngullugit kvartalit pingajuanit 173,7 mio. kr.-iupput, ukiumut kingullermut sanilliullugu 160,2 mio. kr.-iusunit qaffariarsimallutik. ”Ilinniarnermut aamma sulisunut amerlanerusunut annertuumik aningaasaliinikuuvugut. Peqatigitillugu IT-mut aningaasartuutit qaffakkiartorput, tamanna digitalikkut siuariartuinnarnissaq qulakkeerniarlugu pingaaruteqarpoq,” Martin Kviesgaard nassuiaavoq.

Aningaaseriviup sullitanut taarsigassarsiarititanut annaasaqarnermut nalikilliliineri 15 mio. kr.-inut qaffariarput, taamaattumillu suli appasissumiillutik.

Siunissamut naatsorsuutit

GrønlandsBANKEN inernerusunik pitsaalluinnartunik angusaqarnikuugaluartoq, aningaaseriviup kvartalini aggersuni ernianit isertitat appariarnissaat naatsorsuutigaa. Kviesgaardilli tikkuarpaa, paarlattuanik erniat appariarnerat taarsigassarserusunnerulernermik pilersitsisinnaasoq: ”Upperaarput, erniat appasinnerusut aningaasaliinernut ammaassissasoq, pingaartumik Kalaallit Nunaanni takornarialerinermik ingerlatsiviup alliartortup iluani, aammali illunik niuerfiup tamanna iluaqutigissavaa. Maanna takusinnaareerparput, erniat appariartuaarnerisa kingunerigaat amerlanerit illusinissaq pillugu misissuinerat.”

GrønlandsBANKEN-ip aasarli pingasoriarluni nalunaarutigaa erniat appariarnissaat, qitiusumik aningaaseriviit ernianik appaanerat ilutigalugu aamma realkreditimut taarsigassarsiat erniaasa 2023-mi qaffasinnerpaameereerlutik appariaqqinnikuupput.

Aningaaseriviup taarsigassarsiarititai 2023-lli naaneranit 204 mio. kr.-inik qaffapput, maannakkullu 5 mia. kr.-iullutik, niuernerullu annertussusaa katillugu 16 mia. kr.-it missaannippoq.  

”Soorunami ukioq manna siuariarsimaneq nuannaarutigaarput, kiisalu erniat appariartornerat ilutigalugu sullitatta aningaasaleerusussusaasa annertusinissaanut atatillugu neriulluarpugut.” Martin Kviesgaard naggasiivoq.

Ukiumut tamarmut GrønlandsBANKEN-ip 225-250 mio. kr.-it missaanni suli akileraruteqarnani inernerusumik angusaqarnissaminik naatsorsuuteqarnini attatiinnarpaa.