ESG aamma GrønlandsBANKEN suleqatigiinneq ingerlatiinnarpaat

GrønlandsBANKEN aamma Elite Sport Greenland (ESG) sivisuumik suleqatigiinnertik ingerlatiinnarpaat, tamanna ukiuni tulliuttuni marlunni elitesportimut aningaasanik qulakkeerinnippoq.

Elite Sport Greenlandimi siulittaasoq, Nikolaj Christoffersen, suleqatigiinnermik attassiinnarnermik iluarisimaarinnippoq.

- GrønlandsBANKEN-imik suleqateqarnitta ingerlaannarnerata uppernarsarpaa, Kalaallit Nunaanni elitesportimik ineriartortitsinermik suliniuteqarnerput iluatsilluartoq. Periuserput inissaminiippoq, aamma ESG-p iluani, elitesportimik ingerlataqartut akornanni aamma inuusuttut pikkorissut akornanni ineriartorneq pitsaasoq takusinnaavarput, Nikolaj Christoffersen oqarpoq.

Mads Reimer Andersen, GrønlandsBANKEN-imi Aarlerinaatinik isumaginninnermut pisortap, aamma suleqatigiinnerup ingerlaannarnera pitsaasumik isigaa tikkuarlugulu, ESG-p elitesportimik ingerlataqartunik aamma neriunaatilinnik pitsaasumik sullissinera tunngavigalugu isumaqatigiissut sivitsorneqartoq.

- Kalaallit Nunaanni neriunaatilinnik aaamma elitesportimik ineriartortitsinermi ESG qitiusumik inissisimavoq, suliniutaallu pingaartippagut. Elitesportimik ingerlataqartunut aamma neriunaatilinnik ineriartortitsinermut periusissiaanni anguniakkat ersarissumik takusinnaavagut, tamannalu suleqatigiinnitta ingerlaqqinneranut tunngaviulluinnarpoq, Mads Reimer Andersen oqarpoq.

ESG aamma GrønlandsBANKEN 2013-imili suleqatigiilerput, isumaqatigiissullu nutaaq 2025-p naanerata tungaanut atuutissaaq.