Erniat qanittumi apparneri nunatsinni innuttaasunut nammineq pigisamik initaarnissaq piviusunngortinnissaa qaninnerulerpaat, namminerlu pigisaminik ineqareertunut qaamammut akileraarutigisartagaat apparnerussallutik. Piffissaq aggertumi erniat apparnerunissaat aamma ilimagineqarsinnaavoq.

Piffissaq kingullermi erniat apparneri kingunerivaat nammineq pigisamik initaarnermi realkreditikkut aningaasalersornera akikinnerulersoq.

”Illumik pisinissamut isumaliuutersuuteqaruit, taava pitsaasunik nutaarsiassaateqarpugut. Erniat appariarnerisa kingulliit kinguneraat, illit illumik pisinermut aningaasaliinerup ilaatut maannakkut realkreditimut 3,5%-imik taarsigassarsisinnaanngortutit, ukiuni kingullerni 4-6%-inut sanilliullugu. Taamaammat sullitatsinnut nammineq pigisamik initaarnissaq piviusunngornissaa qaninnerulerpoq,” Jimmi Johannesen Grønlandsbankenimi Sullissisunut pisortaq oqarpoq.

”Sinneruttunik aningaasaliinerup, naæilnginnaasumik aningaaserivimmi illumut taarsigassarsiaasartup erniaa malunnartumik appariarsimappat, tamanna illumik pisinermut taarsigassarsinerup katillugu aningaasalersornerata ukioq ataatsip matuma siornamut sanilliullugu akikinnerussaaq,” Jimmi Johannesen taama itisiliivoq. ”Ukiup ataatsip matuma siorna ass. illumik 2,8 mio. kr.-ilimmik pisinermi aningaasaliineq, ullumikkut ernianut sanilliullugu qaammammut akileraarutit sioqqullugit 1.500 kr.-it missaannik annertuneruvoq. Piffissamittaaq matumani siumut naatsorsuinerit takutippaat, erniat ukiumi tulliuttumi aggersumi appariaqqissinnaasut, tamannali allanngupiloorsinnaavoq taama nangippoq.”

Sullitarpassuit isumaqarsimapput, ukiuni kingullerni erniat qaffasinnerusut, illunik niuerfimmut isernissamut imaluunniit illup annerusumik imaluunniit minnerusumik taarsernissaanut ajornakusoortitsisimasut.

”Tamanna isummerneq uggornarsimavoq erniat qanorikkaluarpataluunniit, aningaaseriviup nalilersuutai inunnut ataasiakkaanut tunngasarput kiisalu inuup aningaasaqarnikkut tatiginassusaanut. Taamaasilluni illumik takorloortuaannakkamik nassaarsimagaanni, innersuussutigissavara aningaaserivik attavigineqassasoq, illullu pilerigisap pitaarisinnaaneranutr periarfissat tusarniarneqassasut” Sullissisunut pisortaq taama oqarpoq.

Erseqqissaat: Maannakkut taarsigassarsiarisat nuunnissaanut periarfissaq

Erniat 4%-imit 3,5%-imut allanngorneri isumaqarput, mannakkut illumik piginnittuusut ilaatigut realkreditimut taarsigassarsiarisatik ammut appartissinnaanissaannut periarfissaqarnerannik. Taamaattumik ass. 5 imaluunniit 6%-imik ernialimmik realkreditimut taarsigassarsiaqaraanni, taarsigassarsianik nuussinermi realkreditimut taarsigassarsianut qaammammut akikinnerusumik akiliisalertoqarsinnaavoq, Jimmi Johannesen taama naggasiivoq.