Sullissatta toqqarpaat Neriuffiit Kattuffiat

Grønlandsbanken siullermeersumik sullissani aalingiisussanngortippai, ukioq manna juullimut tunniuttagaq kimut/kikkunnut tunniunneqassanersoq. Ukioq mannalu juullimut tunniuttagaq Neriuffiit Kattuffiannut tunniunneqartussanngorpoq. Aningaasat tunniunneqartussat inuit akornanni attaveqaatit aqqutigalugit, matumani aniningaaseriviup Facebook-iatigut, suliniaqatigiiffiit pingasut aningaaserivimmi sulisunit piukkunneqarsimasut akornanni, taasisitsinikkut ingerlanneqarsimavoq. Tamatumanilu inuit 1.110-t taasillutik peqataasimapput.

Assilisami takuneqarsinnaavoq aningaaseriviup tunniussisussatut aallartitaa, aningaaserinermik ilinniartoq Kristine Heiselberg Thomsen, aningaaseriviup maskotia APPA peqatigalugu, juullimut tunniuttakkamik Aviâja Lyngemut Neriuffit Kattuffiat sinnerlugu tigusisussamut tunniussisoq.

Neriuffiit Kattuffianni siulittaasup, Sara J. Brandt-ip oqaatigai:

-  Nuannaarutigaarput Grønlandsbankenip juullimut tunniuttagai 25.000 kr.-nit uatsinnut tunniunneqarmata. Aningaasammi atorfissaqarteqaagut, suliniaqqinnissatsinnummi atorneqassagamik. Neriuffiit Kattuffiammi assersuutigalugu nappaassuarmik Kræftimik eqqorneqarsimasunut aningaasanik tunniussaqartarpoq, tamannalu Neriuffiit Kattuffiannit pingaarteqaarput, aammalu saniatigut pingaartillugit suliarisarpagut kalaallisut  naqitanngorlugit paasissutissiissusiat, ingerlaaavartumik kræftimik napparsimasunut ilaqutaannullu oqaloqatiginnittartunut siunnersuisartussanillu pikkorissaasanerit il.il.”

Pingaartuuvoq siammasissumik tapersersorneqarluni ikorfartorneqarnissaq

Sara J. Brandtip, nuannaarutigaa, juullimut tunniuttakkanik tuniussinissami innuttaasut peqataajumasut aaliangiisuusimammata.

-  Inuimmi 1.000-it sinnerlugit Grønlandsbanken-ip Facebookiatigut taasisimanerat uatsinnut suli naleqartitsinerulerpoq. Aningaasammi qujanaqaat, kisiannili suliniaqatigiiffittut ingerlanitsinni nuannerpoq takullugulu misigisinnaagatsigu, inuttaaqatitta akornanni siammasissumik tapersersorneqarnerput, tamannami Neriuffiit Kattuffiannut pingaartorujussuuvoq, Sara J. Brandt oqarpoq.

Ukiut tamaasa nunatsinni ikinnerpaamik inuit 190-it nappaassuarmik Kræftimik eqqorneqartarput, Sara J. Brandt erseqqissaateqarpoq.

Grønlandsbankenip siunertanut pitsaasunut Juullimut tunniuttagaa ukioq maanna ukiut tulleriit arfinilissaat tunniunneqarpoq. Siornalu aningaaasat meeqqat piginnaatitaaffii pillugit suliniaqatigiiffimmut MIO-mut tunniunneqarput.

GrønlandsBANKEN-ip Neriuffiit Kattuffiat juullimut tunniuttakkamik tunineqarneranik pilluaqqungaarpaa.