KNAPK-mi siulersuisoq Henrik Sandgreen-ip tusagassiutinut nalunaarummi allappaa ”GrønlandsBANKEN ingasalerpoq”, aningaaseriviup ukiumut nalunaarsiornermini sinerissami aalisarneq isornartorsiutigigaat ”ingasaassinertut pissusilunnertullu” nalilerlugu.

GrønlandsBANKEN-ip KNAPK isumaqatigivaa ”(…)sineriammi aalisarneq pitsaanerusumik ingerlasinnaasoq, tassuunartaatigut GrønlandsBANKEN assortorneqarsinnaanngilaq, aamma pisassanik ilaqqeeqattaartarneq aqutsinissamik ingerlatsinerunngilaq pitsaasoq.”

KNAPK tusagassiutinut nalunaarummi allapput aningaaserivik aalisarneq pillugu ataatsimiitsitaliami tunuarsimasoq. Tamanna ilumuunngilaq. GrønlandsBANKEN-imiit ilaasortaatitaq napparsimanini peqqutigalugu piffissaq kingulleq ataatsimiitsitaliami peqataanngitsoortarpoq, kisiat aningaaserivik ataatsimiitsitaliamiit tunuanngilaq. Aningaaserivik qaqumulluunniit aalisarnermi pitsaasunik atugaqalernissaq suliniutiginiarlugu peqataaffigisassuaa.

Aalisartut isornartorsiorneqanngillat

Aalisarneq atatillugu aningaaseriviup kissaatigaa aalisartut aningaasatigut ingerlalluassasut, maannakkut aamma siunissaq ungasittoq eqqarsaatigalugu, aalisartullu aningaasarsiorsinnaassasut, ilaqutatillu pilersorsinnaallugit, taamaammallu aningaaseriviup aalisartut isornartorsiutiginngilai.

- Aalisartut ullut tamaasa sulilluartaqaat, aamma siunissaq ungasittumi aningaasarsiorluarnissaat pisassaraat. Tamannalu ajornarpoq piujuaannartitsinissamut tunngaveqanngimmat, aalisartullu amerlinikuullutik. Tamanna ukiut arlallit mianersoqqutigisarnikuuarput, aningaaserivimmi pisortaq Martin Kviesgaard oqarpoq.

- Sinerissamut qanittumi qaleralinnik aalisarneq ajalusooriartorpoq, maannakkullu aalisartunut ilaqutaanullu kinguneqalereerluni. Aalisartut isornartorsiutigineqanngillat, kisiat aalisartut atugaat aarlerinartut pineqarput. Takusinnaavarput aalisartut aningaasaqarnikkut ingerlalluarpiarsinnaanngitsut, tamannalu ernumagivarput, Martin Kviesgaard oqarpoq, erseqqissarlugulu aningaaserivik aalisarnermut inuussutissarsiornermut atugarisat pitsaappata aningaasaleerusulluni.

- Allatuulli nalilerparput maannakkut atugarisat, tassaasaut aalisarnermi pisassarititat annertuallaartut, aalisartullu amerlavallaartut, aalisartunut inuiaqatigiinnullu aarlerinartoq, Martin Kviesgaard naggaserluni oqaaseqarpoq, neriuutigalugulu aningaaseriviup arlaleriarluni mianersoqqutigisartagaai, tassa aalisartut ajornartorsiulernissaat, aalisartunut ajunngitsumik kinguneqartussamik aalajangiinissamut kinguneqarumaartut.