Nunarsuarmi eqqissiviilliortoqaraluartoq Kalaallit Nunaanni aningaasaqarneq ingerlalluarpoq. Tamanna 2022-mi ukiup affaani siullermi GrønlandsBANKEN-imi ineriartornermut pitsaasumik sunniivoq, niuerfimmi eqqissisimannginnermik sunnerteqqangasumi.

2022-mi ukiup affaani siullermi aningaaserivimmi suli akileraaruteqarnani inernerusut 45,8 mio.-iupput, taakku 2021-mi ukiup affaani siullermi 74,8 mio.-iusut. Nalimik nalimmassaanerit aamma nalikilliliinerit sioqqullugit inernerusut naammaginartumik kr. 73,1 mio.-iupput, ukiup siuliani 72,0 mio.-iusut.

• Tunngaviusumik ingerlatsineq iluarisimaarparput, ukiullu affaani siullermi negativiusumik nalimik nalimmassaanerit akueriinnartariaqarpagut, aningaaserivimmi pisortaq Martin Kviesgaard oqarpoq

Taarsigassarsisitsinerit qaffannerat ineriartornerup pitsaasuuneranik takutitsipput

2021-p naaneraniilli taarsigassarsisitsinerit kr. 226 mio.-inik qaffariarput, ukiullu affaata siulliup naanerani kr. 4.010 mio.-iullutik.

• 2022-p aallartilluarnera tunngavigalugu taarsigassarsiarititat iluarisimaarnartumik ineriartornissaat naatsorsuutigisimavarput, tamanna 2022-p sinneranut pitsaasumik ilimasulersitsivoq. Sullitat suli aningaasaliisarnerat uagullu ineriartornermut tapiissuteqarsinnaanerput takusinnaallugu pitsaasuuvoq, taama oqarpoq Martin Kviesgaard.

Qularnaveeqqutit 2021-p naaneranit kr. 1.781 mio.-init kr. 190,9 mio.-inik amerleriarput, 2022-mi ukiup affaata siulliup naanerani kr. 1.972 mio.-inut.

Aningaaseriviup taarsigassarsiarititai qularnaveeqqusiinerilu taamaasillutik 417 mio. koruunit missaannik qaffariarput, maannamullu aatsaat taama qaffasitsigigallarlutik.

Ingerlatsinermi isertitat aalaakkaasut ukiup affaani siullermi ilisarnaataapput

2022-mi ukiup affaani siullermi ernianit, akiliutinit allanillu ingerlatsinermi ilanngaateqareerluni isertitat kr. 170,9 mio.-iupput. Tamanna 2021-mi piffissamut tassunga assersuutissagaanni allanngunngingajappoq.

Aningaasartuutit ataatsimut nalikilliliinerit ilanngullugit 2022-mi kvartalip siulliup naanerani kr. 97,8 mio.-iupput, piffissami tassani 2021-mi kr. 98,3 mio.-iusut, taamaasillunilu aningaaseriviup taarsigassarsiarititaani inernerusoq nalimik nalimmassaanerit aamma nalikilliliinerit sioqqullugit kr. 73,1 mio.-inut qaffariarput.

Niuerfimmi eqqissiviilliorneq nalini annaasaqarnermik kinguneqarpoq

Erniat qaffannerisa kiisalu nalinginnaasumik niuerfimmi eqqissiviilliornerup kinguneraa, nalinik nalimmassaanerit juni 2022-p naanerani kr. 25,2 mio.-inik nalini annaasaqartoqartoq, piffissami tassani 2021-mi nalini kr. 5,1 mio.-inik iluanaaruteqartoqartoq. Aningaaseriviup obligationiutai ukiumi qaammatini siullerni arfinilinni erniat qaffariarnerisa kingunerisaanik nalini annaasaqaataapput.

• Isigalugu nuannerpallaanngilaq, kisiannili erniat qaffariarujussuarnerat eqqarsaatigalugu nalini annaasaqarneq ersarippoq. 1 mia.-it sinnerlugit obligationinik tigummisaqaraanni tamakku ilaapput, taama oqarpoq Martin Kviesgaard.

Aningaaserivimmi sullitat taarsigassarsiaanni annaasat annikitsut

Taarsiullugu Grønlandsbankenip aningaaseriviup sullitaasa taarsigassaanni aningaasat amerlanngitsut annaavai. Taarsigassarsiarititanut qularnaveeqqusiinernullu nalikilliliinerit 2021-mi ukiup affaanut siullermut sanilliullugit kr. 0,2 mio.-inik appariarput, 2022-milu ukiup affaani siullermi kr. 2,1 mio.-iinnaallutik.

• COVID-19 maannamut Kalaallit Nunaanni sakkortuallaarunnaarpoq, taamaattumillu inuiaqatigiinnut sunniineq annikinnerpaaffissaminiilluni. Peqatigitillugu 2022-mi takornariaqarnermi pitsaasumik ineriartorneq takusinnaavarput, Martin Kviesgaard oqarpoq.

• Siumut isigigutta qularnartumik inissisimasoqarnerani Kalaallit Nunaat suli najoruminartuuvoq. Kisiannili aningaasat naleerukkiartornerisa ineriartornerat aamma erniat ineriartornerisa minnerunngitsumillu nukissamut akit qaffakkiartornissaannut aarlerinaat eqqumaffigissavagut, Martin Kviesgaard oqarpoq

2021-mi ukiumoortumik nalunaarummi ukiumi inernerusut akileraaruteqareernani kr. 120-140 mio.-it akornanniissasoq missingerneqarpoq, tamanna ukiup sinnerani niuerfimmi annertuumik negativiusumik sunniisoqassanngippat aalajangiusimaannarneqarpoq.