GrønlandsBANKEN aamma DTU Inuplan, Rambøll aamma tntnuuk peqatigalugit piujuartitsisumik sanaartorneq pillugu isummersoqatigiinnermik ingerlatsissapput ulluni 16. aamma 17. februar 2023. Sanaartornermik suliffeqarfimmi aalajangiisartut tamarmik aggersarneqarput.

Siunissami sanaartorneq piujuartitsinermik aallaaveqassaaq – tamanna atortussanik toqqaasarnitsinni, sanaartoriaatsitsinni aamma pingaartumik najugaqariaatsitsinni pissaaq.

Piujuartitsinermik oqallinneq maannakkut nunatsinnut anngutereerpoq, taamaattumillu aamma nammineerluta paasiniartariaqarparput, piumasaqaatit naatsorsuutillu qanoq naammassisinnaanerlugit. Nunarsuarmi naligiiffiusumi aamma pitsaasumik ineriartorfiusumi inuit torersumik inuunermi tunngaveqarnissaannut qulakkerinninnissamut pingaaruteqartumik, siunissami sanaartorneq – piujuartitsinerusumik sammivilik pillugu pissutsit pingaarutillit erseqqissarusuppagut. Isummersoqatigiinnermik siunertaavoq ilisimanerulissagipput, sanaartornermi suliaqartunit assigiinngitsunit qanoq naatsorsuuteqartoqarnersoq, naggataagullu anguniagaavoq piujuartitsisumik sanaartornermut Kalaallit Nunaanni akuersissuteqartarnermut aaqqissuussinermik aalajangersaanissaq.

”Kalaallit Nunaat inissianik pioreersunik nutarsaanermut annertuumik unammilligassaqarpoq. Taakkuninnga nutarsaaneq annertoorujussuarmik aningaasaliinissanik piumasaqaatitaqarpoq, siunissamilu nutarsaanernut aamma nutaanik sanaartornernut atatillugu allanit aningaasaliisoqarnissaanut kissaateqarutta, piujuartitsisumik iliuuseqarnissarput sanaartornissarpullu piareersimaffigisariaqarparput. Soraarnerussutisiaqalernissamut karsit angisuut suliffeqarfiillu aningaasaliisartut allat ullumikkut aningaasaliiffigisami piujuartitsisuunissaannut piumasaqaateqartalereerput. Taamaattumik neriuutigaara, piffissap sivikitsup iluani Kalaallit Nunaanni piujuartitsinermut akuersissuteqartunik sanaartorsinnaanermut aqqut naniumaaripput.” Carsten Th. Pedersen, GrønlandsBANKEN-imi Allaffissornermi pisortaq oqarpoq.

Tove Lading, DTU-mi issittumi sanaartornermi lektoriusup, aamma tikkuarpaa maannakkut nutaanik sanaaartornermi, aammali inissanik pioreersunik nutarsaanermi, siunissami pitsaanerpaamik qanoq sinaakkusersuisoqarnissaasa pisariaqassusaa.

”Kalaallit Nunaanni pissutsit immikkut ittut pillugit, aammali maani nunatsinni sanaartornermi inooriaatsimilu ileqqorisagut naapertorlugit, nunamut tunissuterujussuuvoq maanna siunissamilu piujuartitsilluni sanaartornermut sinaakkutit ukkatarineqalernissaat” Tove Lading oqarpoq.