Ullutsinni peqquserluttariaatsit amerliartuinnartut misigineqartarput
Peqquserluffigineqarneq misigisaavoq nuanninngitsoq killissanillu qaangiiffiusoq, ajoraluartimik ukioqatigiiaanik tamanik amerliartuinnartunik misigineqartartoq. Peqquserlunniartartut digitalikkut nutaanik nassaarsiuinnaavissuupput.
Siunnersuutinik ajornanngitsumik tulliuttunik, neriuutigaarput peqquserlunniartartut paasillugillu unitsissinnaanissaanut ikiorusuppatsigit, taamaasillutit illit imaluunniit qanigisatit peqquserluffigineqassannginnassi.
Matuma ataani peqquserlunniarnerit nalinginnaanerpaat, qanorlu pinngitsoortissaneritit siunnersuutivut pitsaanerpaat takusinnaavatit.
Peqquserlunniarnerit nalinginnaanerpaat
Matumani peqquserlunnerit nalinginnaanerpaat takusinnaavatit:
E-mailit aamma SMS-it
Peqquserluttut e-mailinik aamma SMS-inik ilumuunngitsunik nassiussuikkajuttarput, peqatigiiffimmit imaluunniit suliffeqarfimmit nalunngisaralugulu tatigisanneersuusaarlutik.
Allakkani linkimik imaluunniit tuugassamik, toorsititsiniaasarput – arlalitsigut oqarlutik, iluarsisassamik nukingernartumik peqartoq.
Linki toorukku, quppernermut iserfissamut ilumuunngitsumut assigusorujussuarmulli nuutsinneqassaatit, paasissutissannik tilliffiusumut.
Peqquserlunneq taamaattoq qanoq pinaveersaartissaviuk
E-mailimi imaluunniit SMS-imi linki nammineerlutit piumasimanngisat tuunngisaannaruk.
Eqqaamallugulu: Suliffeqarfik, piumaffigineqarani paasissutissanik mianernartunik SMS-ikkut imaluunniit e-mailikkut piumasoq tatiginngisaannassavat.
Pigisanik atornikunik pisineq aamma tunisineq
Ulluinnarni inuit imminnut oqarasuaatinik angallattakkanik, atisanik allarpassuarnillu pisiffigisarlutillu tuniniaasarput. Pikuerniarfinni pisarpoq, aammali digitalikkut attaveqarfinni aamma nittartakkani pisarpoq.
Inuinnarnik niueqateqaraagavit, eqqumaffigisassavat, profilinik aamma ussassaarutinik ilumuunngitsunik, inunnik allanik uppertitsiniaasunik peqarmat.
Taamaattumik neqeroorutitsialammik takugaangavit eqqarsaqqaarit. Neqeroorut piviusuunissaminut pitsaavallaarpat, ajoraluartumik peqquserlunniarnerukkajuppoq.
Sissuertariaqarputit:
- Tuniniaasoq utoqqatsissutissaqarpallaarpat sooq nioqqutissaq aggerlutit takusarsinnaannginnerit.
- Nioqqutissaq sumiiffinnit allanit akikinnerujussuarmik tuniniarneqarpat.
- Tuniniaasup imaluunniit pisiniap profilia tatiginarpasinngippat.
- Tuniniaasoq akiliinermut ”uppernarsaammik” nassiussippat, aningaasalli kontonni takusinnaanngikkukkit.
Aningaasaliinermi peqquserlunneq
Inuppassuit aningaasaatiminnik aningaasaliinikkut pisuunngornissaq takorloortarpaat. Tamanna peqquserlunniat atornerluttarpaat. Inuit attaveqatigiittarfiini ussassaarutit ilumuunngitsut atorlugit peqquserlunniat aningaasaliinikkut iluanaaruteqarnissamut pilerisaarisarput. Arlalitsigut inuit ilisarisimaneqarluartut atornerluttarpaat, piumanatik ussassaarummi atorneqartarlutik.
Paasisaqarneruniarlutit allakkuit, peqquserluttartumik tuniniaasuusaarnermik sungiusarluarsimasumik, ”aningaasaliinermi siunnersortitut” taaneqartumik oqaluussaqartissavaatsit. Peqquserlunniartut anguniagaraat sapinngisamik aningaasanik amerlasuunik peqquserlunnermut aningaasaliinissat.
Nakkaannaruit, ajoraluartumik aningaasaatitit takoqqissanngilatit imaluunniit iluanaaruteqassanngilatit.
Peqquserlunneq taamaattoq qanoq pinaveersaartissaviuk
Imminut tusarnaarluarit tatiginassuserlu misissorluaruk. Nangaallatsiaruit imaluunniit eqqunngitsumik misigiguit, arlalitsigut arlaannik ajortoqarsimassaaq.
Asanninneq atorlugu peqquserlunneq
Asanninneq atorlugu peqquserlunneq nittartakkakkut aallartikkajuttarpoq. Inuit attaveqatigiittarfiatiguusinnaavoq imaluunniit quppernerni aappassarsiortarfinni, arlalitsigut peqquserluttoq ”arnaq kusanartuusaartarpoq” imaluunniit ”obersti nunami allami suliaqartoq”.
Attaveqarneq sukkasuumik aamma oqarasuaammut imaluunniit videokkut oqaloqatigiinnermut nuuttarpoq. Matumani peqquserluttup asanninnini nalunaarutigisarpaa ataatsimullu siunissaq eqqartulersarlugu. Piffissaq ingerlareerpat peqquserluttoq aningaasanik qinnuulersarpoq assersuutigalugu angalanernut imaluunniit napparsimavimmut aningaasartuutinut.
Peqquserlunneq taamaattoq qanoq pinaveersaartissaviuk
Isumassarsiatsialaasinnaavoq nittartakkakkut aappartaaruit, inummik tatigisannik oqaloqateqarnissat. Asannilersimanermi mianerisassat takunissaat ajornakusoorluinnarsinnaammat.
Naameerit oqarasuaatikkut aningaasanik nuussequsaaguit, imaluunniit MitID-mut paasissutissanik tunniussequsaaguit imaluunniit SMS-ikkut imaluunniit e-mailikkut linkimik tuugassamik nassitsikkuit. Aamma aningaaseriviit oqaloqatigiuk kontot illersorniarlugu periarfissat pillugit, aningaasanik nuussinissamut aningaasat annertussusaasa killissanik aalajangiinikkut. Taamaasillutit isumannaatsuussaatit.
Pinerloqataasutut akunnermuliunnissat pinngitsoortiguk (muldyr
Eqqumaffiginnigit
Eqqumaffiginnigit, inuit ilisimanngisatit imaluunniit nalunngisatit annikitsumik ikioqquppata immaqa akiliillutik.
- Aningaasat ajornannginaarneqakkajunneq ajorput. Pinerloqataasutut akunnermuliunneq inerteqqutaavoq. Aarlerinartorsiorneq imminut akilersinnaanngilaq.
Aningaaserivimmi paasissutissaatitit mianerikkit
Aningaaserivimmi kontot allanut atukkiutinngisaannaruk imaluunniit aningaaserivimmi paasissutissatit allamut tunniutinngisaannakkit - taakku ilinnuinnaq atugassaapput.
Politiinukarit
Politiinukarit, pasilliuteqaruit pinerloqataasutut akunnermuliussimallutit imaluunniit pinerloqataasutut akunnermuliutsinniarneqarlutit.
Pinerlunnermik unitsitseqataagit imminullu illersorlutit.
