Grønlandsbanken-ip Inuussutissarsiornermut aningaasaateqarfiata ukioq manna aallartisaasumut akissarsiaritittakkani Anita Høegh, Qiviut ApS-imut tunniunneqassasoq toqqarpaa.

Inuussutissarsiornermut aningaasaateqarfiup ukiuni arlalinni aallartisaasumut akissarsiaritittagaq inummut imaluunniit suliffeqarfimmut, immikkut maluginiarneqartumut tunniuttarpaa.

Ukioq manna toqqarneqarpoq Anita Høegh, Qiviut ApS, taassuma akissarsiaritittagaq tiguaa 2008-mili umimmaap qiviuanik nioqqutissiornerup tunisinerullu iluani immikkut ilisimasaqarnini tunngavigalugu. Sulineq najukkami inuussutissarsiornermi annertuumik suliaqartitsisoq, piniartunit pisinermit niuertarfinni nioqqutissap tunineqarnerata tungaanut.

Grønlandsbanken-imi Inuussutissarsiornermut aningaasaateqarfimmi siulersuisuni siulittaasup, Kristian Lennert-ip Anita Høegh-p toqqarneqarnera ima oqaasertalerpaa.

Anita Høegh-p atortoq kissassimaarut iluartoq pitsaalluinnartumik akullugu, najugaqartunut takornarianullu pilerinarluinnartoq pilersippaa. Matumani Qiviut ApS-ip najukkami pisiortorfiit siuarsaaqataaffigai, siusinnerusukkut kialuunniit angusimanngisaanik. Anita Høegh niuernermut silassorissutsikkut ilungersuuteqarnikkullu nioqqutissamik nunatsinneersumik immikkuullarissumillu pilersitsivoq, Kalaallit Nunaanni nunarsuullu sinnerani tuniniarneqarsinnaasumik, niuertarfiit saniatigut webshop-imik, Kalaallit Nunaata sinneranut kiisalu nunarsuup sinneranut anngutsitsisumik pilersitsinikuugami. Tamanna Grønlandsbanken-ip Inuussutissarsiornermut aningaasaateqarfianit nersorusupparput, Kristian Lennert taama naggasiivoq.

Anita Høegh piniartunut pisisarnikkut kiisalu amernit qiviunik piiaanikkut, immikkoortiterinikkut, saliinikkut kiisalu nioqqutissiorluni qissinikkut kalaallit nioqqutissiaannik immikkuullarissumik pilersitsivoq, tamakku tamarmik tunisassiamik naleqalersitsinermi immikkoortunut tamanut iluaqutaasumik. Ukiumi aallartisaasumut akissarsiamut checki kr. 25.000 nalinganut ilaavoq.