GrønlandsBANKEN-ip ullumikkut 2024-mut ukiumoortumik nalunaarutini saqqummiuppaa. Aningaaseriviup akileraarutit sioqqullugit kr. 245,7 mio.-it inernerusut anguai, 2023-mi kr. 244,6 mio.-inut angusanut sanilliullugit, taakku oktober 2024-mi guidancep kukkunersiugaasup kr. 225-250 mio.-inik angusaqarnissamut iluaniipput.

Peqatigitillugu Grønlandsbankenip saqqummiuppaa Kalaallit Nunaanni takornariaqarnermut aningaasaliinernut ikiuinissamut suliniuteqarneq.

Taamaattorli nunarsuarmi politikkimi inissisimaneq nalorninartoqalersitsivoq, aningaaseriviup siumut isiginiarnerani.

Ukiumi kvartalimi kingullermi isertitat appariartut

2024-mut ukiumut naatsorsuusiorfimmut inernerusut naatsorsuutaareersutut qaffasissumik inissisimapput, peqatigitilluguli ernianik appariartortunik sunnersimaneqarlutik.  
Aningaaserivimmi pisortaq, Martin Kviesgaard oqarpoq: "Naatsorsuutigisatut inernerusut kvartalimi kingullermi appariangaatsiarput, tassani suli akileraaruteqarnani sinneqartoorutit 52,1 mio.-iupput, kvartalimi tassani 2023-mi 73,8 mio.-iusut. Tamatumunnga ilaatigut pissutaapput erniat appariartorneri kiisalu aningaasat nalinginut iluarsiissutit appasinnerunerat.” 
”Taamaattumik erniat apparnerat aatsaat ukiup naalernerani malunnarsivippoq, 2025-milu erniat suli appariartornissaat naatsorsuutigaarput.”

Aningaaserivimmi siuariartorneq

Aningaaserivik 2024-mi aammaarluni siuariartornermik kusanartumik misigisaqaqqippoq, tassani taarsigassarsiarititat 4,5 %-imik qaffariarput 5 mia. koruuninngorlutik, ataatsimut naatsorsuutit siullerpaamik 10 mia.-iullutiki. Kalaallit Nunaanni aningaaseriviup sullitaanut taarsigassarsiarititaannaat, qaffarianngillat. Aningaaserivimmiititat aamma 700 mio.-it sinnerlugit qaffariarput, soraarnerussutisiaqalernissamut ileqqaakkat amerleriarnerat soorlu aamma aningaaserivimmi malugineqarsinnaasoq.
”Ineriartorneq iluarisimaarparput, isumaqarpungalu, unammillersinnaasutsikkut inissisimalluarnitsinnik takutitsisoq”, Martin Kviesgaard oqarpoq
”Sullitat ukiup ingerlanerani kusanarluinnartumik aningaaserivimmiititanit erniasipput takusinnaavarpullu, aningaaserivimmiititat amerleriangaatsiarsimasut. Kalaallit Nunaat tamakkerlugu Kalaallit Nunaata ineriartorneranut peqataavugut, tamannalu isumaqarpoq sammisanut nutaanut taarsigassarsiinernik amerlanerusunik aammattaaq sullitat misigisaannik pitsanngorsaaniarluta annertuumik aningaasaliivugut.”

Erniat apparnerat naatsorsuutigisamit kingusinnerusukkut takkuppoq

2024 aallartimmat erniat allanut sanilliullugit qaffasinnerupput, tamanna inuiaqatigiinni aningaasaleerusussusermut negativimik sunniuteqarsimavoq, tamatumani erniat appariarnerat naatsorsuutigisamit kingusinnerusukkut takkussimammat. 
Ilanngaaseereerluni ernianit isertitat 2024-mi kr. 35,2 mio.-inik qaffariarput kr. 470,3 mio.-inngorlutik. Tamanna ilaatigut ukiumut annertuumik taarsigassarsiaqartitsinermit. Peqatigitillugu erniat qaffasissusaat aningaaseriviup obligationini pigisanit kiisalu Nationalbankenimi aningaaserivimmiittuutinit isertitat qaffariarput. 
Akiliutinit iluanaarutisianillu isertitat 2024-mi ukiup siulianut sanilliullugit appariarput.
”Ersarippoq, erniat qaffasinnerunerat sullitat aningaasaleerusussusaannik appasitsitsisimasoq. Paarlattuanik maannakkut erniat appariartuaarput, naatsorsuutigaarpullu 2025-mi illumut, umiatsiamut aamma biilinut aningaasaleerususutsimik annertusaassasoq, suliffeqarfiit aamma ajornannginnerusumik imminut akilersinnaasumik aningaasaliisinnaanngussapput.”  

Aningaasartuutit naatsorsuutigisatut qaffariarput

”Isumaqatigiissutit qaffannerisa saniatigut sulisunut amerlanerusunut, minnerunngitsumillu IT-mut, malittarisassanik malinninnissamut piumasaqaatit annertusiartornerannut kiisalu sillimaniarnermut annertunerusunik aningaasartuuteqarpugut. Uagut immikkuullarissutiginngilarput, aningaaserivinnili tamani ilisimaneqarpoq, akisuvorli.” pisortaq oqarpoq.  

Annaasaqarnerit nalikilliliinerillu killeqartut

Nalikilliliinerit immikkoortitsinerillu 2024-mi appasipput kr. 18,9 mio.-iullutik, 2023-mi kr. 14,2 mio.-iusut.
”Qaffariartoqaraluartoq, tamanna suli appasissutut isigaarput, ersarissumillu takutippaa, inuiaqatigiit kiisalu aningaaseriviup sullitai aningaasaqarnikkut pitsaasumik qajannaatsumik inissisimasut. Tamatuma takutippaa, inissisimalluartugut, 2024-mi nunarsuaq tamakkerlugu annertuumik allanngorartoqaraluartoq” aningaaserivimmi pisortaq oqarpoq.

Pappialanut nalilinnut naliusumit iluanaarut

Naliusumit iluanaarutit appasinnerulaaraluartut aningaaseriviup obligationii aamma ingerlataqarfinni aktiai kiisalu nunat allat aningaasaat pillugit immikkoortoq 2024-mi inernerusumut pitsaasumik tapersiipput. 2024-mi katillugit kr. 28,6 mio.-it isertitarineqarput, 2023-mi isertitat kr. 40,1 mio.-iusut.

Takornariaqarnermik inuussutissarsiut – aningaasaqarnermi sukaq pingaarutilik

Grønlandsbankenip takornariaqarnermi ineriartorneq, suliniummik annertuumik nutaamik inerisarusuppaa.
”Najukkami takornariaqarneq ineriartornissamut periarfissanik annertuunik peqarpoq. Kalaallit Nunaat tamakkerlugu suliaqartunik oqaloqateqarnerit aallaavigalugit takusinnaavarput aningaasaliinissamut piffissaq maannakkuusoq. Nutaanik attaveqaasersuuteqarnermi periarfissat atorluarnissaat pingaaruteqarpoq, tamannalu siumut annertuumik aallariartikkusupparput. Sapaatip akunnerini aggersuni takornariaqarnermik ineriartortitsinermut immikkut nioqqummik saqqummersitsissaagut. Takornariaqarnermik inuussutissarsiornermi siuariartornissamut aningaasanik immikkut iluanaarnartumik 100 mio. koruunit tungaanut illuartitsivugut. Takornarialerisut ataasiakkaat aningaasaliinissaasa tulliit nukittorsarnissaannut aalajangiisumik tapersiissutaasinnaapput kiisalu ataasiakkaani aningaasaatinik nukittorsaalluni. Upperaarput, takornariaqarnermi aningaasaliinernut amerlanerusunut siumut aallartitsisinnaasoq.”, Martin Kviesgaard oqarpoq.

Ukiup nutaap aallartinnera nalinginnaanngitsoq

Europami aningaasat naleerukkiartornerat iluarsiartormat, naatsorsuutaavoq, naatsumut erniat appariassasut, aningaasartuutillu annikillissasut. 
”Tamanna sullitanut pitsaalluinnarpoq, piffissarlu ungasinnerusoq eqqarsaatigigaanni pitsaasuuvoq. Taamaasillutali 2025-mi aningaaserivimmi isertitagut appasinnerulissapput, erniat appasinnerusut piffissaq qaninnerusoq eqqarsaatigalugu negativiusumik sunniuteqassammata, tamannali ajorinngilarput.” 
”Paarlattuanik oqartariaqarpugut, nunarsuaq tamakkerlugu politikkikkut nalorninartorsiorneq kiisalu Kalaallit Nunaanni sunnertisimaneq immikkorluinnaq immat. Nalilersussallugu ajornakusoorluinnarsinnaavoq, tamana sullitatsinnut kiisalu kalaallit aningaasaqarnerannut piffissaq qaninnerusoq ungasinnerusorlu eqqarsaatigalugit qanoq sunniuteqarumaarnersoq”, Martin Kviesgaard naggasiivoq
Aningaaseriviup 2025-mi suli akileraaruteqarnani ukiumut inernerusussatut naatsorsuutigai kr. 150-185 mio.

Iluanaarutit

Qulaani allassimasut tunngavigalugit tunngaviusumik aningaasaatit suli qajannaatsumik inissisimasut nalilerneqarput, aktiamullu ataatsimut kr. 100-nik iluanaaruteqartoqarnissaa inassutigineqarpoq, ukiumi siuliani kr. 55-inut sanilliullugu. Aningaaseriviup tamatuma kingorna akiliisinnaanermut procentia 26,9-miissaaq 2023-mi 26,0-iusoq. Akiliisinnaanermut pisariaqartitsineq allanngorani 11,1%-iuvoq. Iluanaarutit annertugaluartut qitiusumik aningaasaatit 25,1%-iupput, siunissaq ungasinnerusoq eqqarsaatigalugu aningaaseriviup 24% anguniagarigaa.