Nammineq suliffeqarfimmik aallartitsinissat takorluugaraajuk? GrønlandsBANKEN-imi aallartinnermit ajornaatsuunissaa isumagissavarput. Aaqqiissummik neqerooruteqarpugut, pilersitsinermut aningaaserivimmi nioqqutinik pisarialinnik tunniussisumik – annerusumik imaluunniit minnerusumik.
Aallartisarninni ikiussavatsigit
Suliffeqarfimmik aallartitsinissamut aningaasaateqarnissaq pisariaqarput, kisiannili suliffeqarfivit qanoq ittuunera kiisalu pisariaqartitatit apeqqutaassapput qanoq annertutigisumik aningaasaateqartariaqarnersutit. Taamaattumik pingaaruteqarpoq ersarissumik suliassannut pilersaaruteqarnissaq kiisalu piviusorsiortumik missingersuuteqarnissaq. Iluaqutaassaaq ataatsimut takusinnaassallugu, qanoq annertutigisumik aningaasaliinissaq pisariaqartinnerit – aallartisarnermi kiisalu piffissami siullermi aarlerinartorsiorfiusumi suliassat ingerlatiinnarnissaannut.
Aningaasaliisariaatsip illit pisariaqartitannut tulluarnerpaap nassaarinissaanut ikiussavatsigit.
Aallartisaasunut Grønlandsbanken-ip pingaarnertut nioqqutai tassaapput
Konto aamma netbank: Suliffeqarfinnut inuussutissarsiornermi konto. Netbank inuussutissarsiornermut, annertunerusunik periarfissaqartoq.
Taarsigassarsiat aamma akiligassarsiat: Ingerlatsinermut aningaasaliinermut inuussutissarsiornermi akiligassarsiat. Illuutinik, ingerlatsinermi atortussanik il.il. aningaasaliinermut inuussutissarsiornermi taarsigassarsiat.
Qularnaveeqqutit: Sanaartornermi isumaqatigiissutinik suliaqarnermut atatillugu sulinermi qularnaveeqqutit. Pisiniarfigisartakkanut, akiligassiisartunut akiliinissamut qularnaveeqqutit.
Siunersuineq aamma siunnersuineq: Aningaasalersuineq, niuernermi pilersaarut, missingersuusiorneq, piujuartitsineq, aningaasaliineq il.il.
Aningaaseriviup aallartisaasumut suut piumasaqaatigai
Konto aamma netbank
Inuussutissarsiornermi kontomik aamma netbankimik pilersitsisinnaaniaruit, CVR normoqassaatit.
Suliffeqarfiup qanoq ittuunera apeqqutaalluni kinaassutsimut uppernarsaatinik nassiussissaatit.
Inuussutissarsiornermi netbankeqarnermut qaammammut akiliuteqarpoq.
Taarsigassarsiat aamma akiligassarsiat
Naatsorsuutit, missingersuutit, niuernermi pilersaarutit il.il. tunngavigalugit aningaaserivik aningaasaqarnermik naliliissaaq.
Aningaasaliinernut aningaasalersuinissamut taarsigassarsinissamut ilaatigut nammineq aningaasaliinissaq nalinginnaasumik piumasaqaataasarpoq.
Pilersitsinermut, taarsigassarsiat akilersornerannut ernianut, aamma akiligassanut aningaasartuuteqassaaq.
Qularnaveeqqutit
Sanaartornermi isumaqatigiissut imaluunniit pisiniarfigisartakkanut isumaqatigiissut, kiisalu aningaasaqarnermik naliliinermut paasissutissat tunniunneqassapput.
Pilersitsinermut, kiisalu piffissami qularnaveeqquteqarfiusumi akiligassanut aningaasartuuteqassaaq.
Aallartisaanermut aningaasalersuineq
Aallartisaanerup aningaasalersornissaa unammillernarsinnaavoq, arlalitsigut piffissaqassaaq aningaasartorfiusumik, isertitaqarfiunngitsumilli. Amigartooruteqarneq aamma negativiusumik nammineq aningaasaateqarneq aningaasartuutit isertitanit amerlanerunerisa kingunerisarpaat, Aningaaseriviullu aningaasaatinik naliliinerani inernerit positiviusut aamma nammineq aningaasaatit annikinnerpaamik 20 %-iunissaat piumasaqaataakkajuttarpoq.
Taamaattumik amerlasuut aallartisaanermi aningaasalerneqarnissamik qinnuteqarneq ass. NALIK Ventures-imut aamma/imaluunniit namminersorlutik aningaasaliisartunit/taarsigassarsititsisartunit aningaasalerneqarneq iluaqutigisarpaat. Tamanna aamma Aningaaserivimmit taarsigassarsinissamut angusaqarnissamut periarfissanik pitsanngorsaasinnaavoq. Siunnersorsinnaavatsigit aningaasatigut sumi qanorlu tapersersorneqarnissamut qinnuteqarsinnaanersutit.
Aamma amerlasuut aallartisaanertik allatigut aningaasalersorniarlugu ujaasisarput, ass. crowdfunding, Business Angels, imaluunniit ilaquttat ikinngutillu ikiuukkusuttut aqqutigalugit. Periarfissat assigiinngitsut pillugit oqaloqatiginissatsinnut tikilluaqqusaavutit.
Aallartisaanermut atortussat
Nalik Ventures aallartisaasunut atortussanik arlalinnik neqerooruteqartarput, ilaatigut paasissutissanik Aningaaserivimmut tunniussiniarnermi atorneqarsinnaasunik.
Atortussanik makkuninnga ilaatigut nassaarsinnaavutit:
- Ingerlatsinermut missingersuutinut, akiliisinnaassutsimut missingersuutinut aamma pilersitsinermi missingersuutinut skabeloni
- Niuernermi pilersaarummut, Business Model Canvas-imut skabeloni
- Tapersersorneqarnissamut periarfissat aamma siunnersorneqarnissaq pillugu paasissutissat
Nalik Ventures
Nalik-p nittartagaani taperserneqarnissamut tunngasunik atuarit suliffeqarfiutivillu pilersaarutissaanut missingersuutissaanullu tunngasunik skabeloninik nassaarlutit.
Aallartisaanerup ataqatigiinnera
Aallartisaasutut aallartisaasunit allanit, namminneq ilittut inissisimasimasunit nalinginnaasumik pitsaanerpaamik ikiorneqassaatit.
Arlalitsigulli allaffissornermut aamma ikiorneqarnissaq pisariaqartittassavat, ass. naatsorsuusiortoq aamma kukkunersiuisoq aqqutigalugit.
Kommunimi pisortatigut inuussutissarsiornermi siunnersortit aamma Nalik-venturesimi periarfissat pillugit oqaloqatiginneq iluaqutigisinnaavat.
Tamakku saniatigut avatangiisinit assigiinngitsunit inuit suliaqartut attaveqatiginerisigut iluaqutissarpassuarnik aallersinnaavutit. Ilisimatuut, ilisimasaminnik ikiorsinnaavaatsit, aaqqissuussanik aaqqissuussisartut, oqaaseqartartuusinnaapput, imaluunniit suliffeqarfiit angisuut, nioqqutissannik tuniniaanermi ikiorsinnaavaatsit.