Hotel Sisimiut

Illoqarfigisami aallarnisaasut - Grønlandsbankimit tapersersorneqartut - Sisimiuni hoteliutertik aappertussanngorpaat. Issittumi sanaartornerup iluani nutaaliornermik takutitsivoq aammalu Kalaallit Nunaata illoqarfiisa annersaasa tulliani takornariaqarnermik annertusaasinnaalluni.

Morten Bøckerimit

Sisimiuni ukioq kaajallallugu misigineqarsinnaasut immikkuullarissut ilisimaneqaatigisaasa ilagaat qimusserneq, asiliarnerit qamuteralannillu immikkuullarilluinnartumik misigisassarsiornerit, heliski, asimi pisuttuartitsineq, qissattarneq, kangerlunni umiatsiarneq minnerunngitsumillu Arctic Circle Race, nunarsuarmi tusaamasaasoq ujakkaarluni sukkaniunneq.”

Takornariaqarneq suli illoqarfimmut pingaaruteqarneruleriartorpoq, aasamullu ineriartornerup aamma tapersernissaanut alloriartoqassalluni. Hoteli nutaaq piumaneqarluartunik hotellejlighed-inik takornarianut allanullu attartortitsisalissaaq. Sanaartortuuppullu Hotel Sisimiut piginnittui aappariit Anette Grønkjær Lings aamma Bo Lings. 

2023-mi Grønlandsbanken aningaasaqarnikkut siunnersortigalugu aalajangerput, sanaartorfissami ukiualuit matuma siorna pissarsiarisimasami sumik sanaartortoqarnissaanik, illorsuup ikuallatsitsisoqarnerata kingorna atorsinnaajunnaartup inikuani.

- Aallaqqaammut sanaartukkamik nalinginnaasumik pilersaaruteqaraluarpugut, kvadratmeter-imulli akia qaffasippallaarsimavoq. Taamaammat sanaartoriaatsinik atortunillu allanik misissuilluta aallartippugut, Bo Lings oqaluttuarpoq.

Sanaartortut aamma aaqqissuussaanikkut allatut ingerlatsipput, illoqarfigisami suliffeqarfiit minnerit håndværksmesterii atornerisigut, namminerlu aqutsineq aammalu qaffasissumik pitsaassuseq angujumallugu.

- Ataatsimut isigalugu suliffeqarfeeqqanut pilersaarusiaq angivallaarsimavoq, taamatulli pinitsigut tapersersorpavut, sanaartornermullu peqataanerminnut tulluusimaarneri takuneqarsinnaallutik, Bo Lings oqarpoq.

Kalaallit Nunaanni ineriartornermut kr. 100 mio. immikkoortinneqarput

Grønlandsbankimut hoteliliorneq assersuutaalluarpoq qanoq bankip ineriartorneq takornariaqarnerlu tapersersorusunneranik aamma illoqarfiit imarpik ikaarlugu timmisartunut mittarfittaartut avataanni. 

- Sanaartortunut misilittakkagut atorluarusuppagut qanimullu suleqatigiinneq siunnersuinikkut, sanaartornerup nalaani aningaasaqarnikkut, ataavartumik immersoqatigiinnikkut aammalu aningaasalersuiinnarnissamut neqeroornikkut, Jesper Overgaard Sørensen Grønlandsbankimi Illuutit Aningaasalersorneqarnerannut Pisortaq oqarpoq. 

Taassuma oqaatigaa naatsorsuutit kingulliit tunngavigalugit kr. 100 mio. takornarialerisunut allisaaniartunut, immikkut ittunik pitsaasunillu atugassarutitalinnik, immikkoortitsisimallutik.

Sanaartortitsisullu pilersaarutiminnut atatillugu eqqartuinissaannut kajumilersitsipput.

Bo Lings Grønlandsbankimik suleqateqarnerminut ajunngitsuinnarmik eqqaasassaqarpoq:

- Bankilu suleqatigiinneq, siunnersorneqarneq ataavartumillu eqqartuisarneq naammagisimaarluarpavut. Pilersaarutivut missingersuutivullu tigulluarneqaqaat, Bo Lings oqarpoq.

- Sisimiut aallarnisaasoqarfiuvoq aasakkullu ulapputtoqarnerata nalaani unnuisarfeqarnissaa pisariaqarnerulersarluni. Suliffeqarfiutillit Grønkjær Lings suleqatigilluarpavut, Jesper Overgaard Sørensen oqarpoq.

Toqqaviliornerit nutaaliat

Takornariat suliffeqarfiutillillu hotelitaami unnuisarfinnut iserterpata, betonimik toqqaviliaanngitsumi saviminernilli atortulimmiissapput. 

- Uani inissisimaffimmi qaarsumit qummut meterit qulit inissisimavoq, nalinginnaasumillu toqqaviliorniaraanni assaarujussuarneq betonimillu atuerujussuarneq pisussaagaluartoq Bo Lings-ip oqaatigaa. 

- Taamaammat periuseq Norgemi ukiuni qulikkaani arlalinni, nunami qaarsumut atanngitsumi qeriuaannartumilu atorneqartareersoq malipparput. 

- Napasut saviminiusut allamik sisammik aamma qalligaapput ikerilu betoniusamik immigaallutik, vinkelinik eqqoqqissaartunik nunamut meterinik marlunnik ititigisumut qillerullugit inissitaallutik. Napasuliat qaavini, qangatasumi ussissarluagaasumilu illorsuup assiaqutai qalliit inissisimapput, Bo Lings oqarpoq.

Illorsuaq tamarmi qisuttaqanngilaq, isugutak, oquk innerlu piusinnaajunnaarlugit. Nillertumut illersuutilinnik ussilluartunillu silarlernik ilaatigut iigaqarpoq. 

Hotelimi unnuisussat aamma silaannarissaateqarfik, kissarnermik atoqqiisoq, silaannaritsitsilluinnartoq qilanaarutissaraat.

Hoteli nukissamik atuinikitsuararsuussaaq. U-værdi 0,11-uvoq, kiffiutissaq nalinginnaasoq 500 mm atorneqartoq naligalugu. 

Allanillu tulluarneqanngilaq misigisassarsiorluni qimussereernermi, ujakkaareernermi aalisariareernermiluunniit niut qaqillugit kakaotorusaarfigissallugu.