Kalaallit Nunaanni sanaartornermi takornariaqarnermilu aningaasaqarnikkut suleqataasoq
Grønlandsbanki ukiunut aggersunut takornariaqarnermut ilimasuuteqartorujussuuvoq. Hotelinut banki siunersiueqatigisakkatut inissisimavoq taarsigassarsiniartarfiullunilu maannalu SØMA hotelit suleqatiginerat nuannaraarput.
Jacob Egevang-imit
Kalaallit Nunaanni sanaartornermi takornariaqarnermilu annertuumik aningaasaliisoqarneruleriartortillugu Grønlandsbanki pingaarutilimmik inissisimanissani angorusuppaa, aningaasaqarnikkut ungasissorlu isigalugu suleqatitut. Illuliortitsisartunik, entreprenørinik suliffeqarfinnillu takornarialerisunik unnuisarfiutilinnillu Grønlandsbanki qanimut suleqateqarpoq, nuannaarutigalugulu tassuunatigut ineriartorneq peqataaffigisinnaagatsigu, nunamummi tamarmut pingaaruteqarmat.
- Nalunngilarput sanaartornissamut suliffeqarfiuteqarnissamullu suut pisariaqartinneqarnersut, Jesper Overgaard Sørensen oqaluttuarpoq, Grønlandsbankimi Illuutit Aningaasalersorneqarnerannut Pisortaq.
- Kalaallit Nunaanni pissutsit tunngavigalugit siunnersuisarpugut sanaartornermilu nalinginnaanerusut kiisalu takornariaqarnermi pisariaqartinneqaleraluttuinnartut tapersersortarlutigit, tassunga ilanngullugit pingaartumik Kalaallit Nunaanni hotelini unnuiffissat.
Grønlandsbanki ukiuni qulikkaani Kalaallit Nunaanni sanaartornermi inuussutissarsiornermilu suliniutinut qanimut suleqataasarpoq – inissialiornermiit hotelit allilernerinut atortulersuutinullu tunngasunik aningaasaliinernut. Nykredit aamma DLR Kredit aqqutigalugit realkredit-imik periarfissiisinnaaneq atorlugu banki aningaasaliinissanut assigiinngitsunik neqeroorsinnaasarpoq erniat aalajangersimasuusinnaallutik sivisuumillu akilersorneqarsinnaallutik. Taamaattoqarneratigut suliniutini annertuuni aningaasaqarnikkut toqqissisimasoqartarpoq, ukiorpassuarnimi ingerlasussaasarmata annertuumillu aningaasanik pisariaqartitsisoqartarluni.
SØMA - hoteliinnaanngitsut
Takornariaqarnerup ineriartornerani Grønlandsbankip peqataaneranut assersuutissaqqissoq tassaavoq Sømandsmission-ip, Kalaallit Nunaanni hotelinik sisamanik ingerlatsisuusut, ukiorpassuarni suleqatigineqarnera. SØMA tassaavoq hotelinik arlalinnik ingerlatsisoq aningaasannanniarfiunngitsoq, Sømandsmission-imit ingerlanneqartoq. Unnuisarfiit, spa aamma ataatsimiittarfiit saniatigut aamma Nuummi, Ilulissani, Sisimiuni Aasiannilu illoqarfinni taakkunani umiarsualiveqarfiusuni inunnik sullissinermi peqataalluartarput.
Hotelinik ingerlatsineq Sømandsmission-ip sulineranut aningaasatigut toqqammaviliisuuvoq, suliaallu ilaatigut ukuupput angerlarsimaffeqanngitsunut nerisassat akeqanngitsut, umiartortunut tunissutissanik tunniussineq kiisalu inunnik suliaqarnermut tunngasut soorlu qilattaaqatigiisitsinerit, meeqqat klubbertinneqartarnerat allatigullu ataatsimoortitsinerit hotelit iniutaanni.
- ukiut tamaasa angerlarsimaffeqanngitsunut nerisassanik tuusintilinnik tunniussisarpugut, umiartortut, aalisartut piniartullu, kiisalu umiartortut nunanit allaneersut pillugit inunnik isumaginninnermik suliaqartarpugut. Taakkua saniatigut aamma hotelini assigiinngitsorpassuarnik aaqqissuussisarpugut kalaallinik tikeraanillu katersuutsitsisunik, taama oqaluttuarpoq Mads Futtrup, Hotel Søma-mi attaveqatigiinnermut pisortaq.
Sisimiuni hotelip allilerneqarnera
SØMA massakkorpiaq Sisimiuni hotelimik allilereruttorpoq, init 34-niit 56-inut amerlineqarlutik, ataatsimiittarfiit nutaat ilorrisimaartarfiillu ilallugit inuussutissarsiortunit takornarianillu amigaatigineqarneruleriartorneri pissutaallutik.
- Aningaasaqarnikkut ajunngitsumik ingerlavugut, taamatulli annertuumik sanaartorniartilluni pilersaarusiorluarnissaq aningaasatigullu pitsaasumik siunersiueqateqarnissaq pingaaruteqarpoq. Grønlandsbanki uagutsinnut suleqatitut pitsaasuuvoq, hotelip allilerneranut aningaasaqarnikkut ilusilersuinermut piffissarlu ungasinnerusoq eqqarsaatigalugu ingerlariaasissamut tunngatillugu, Mads Futtrup erseqqissaavoq.
Grønlandsbankimut pitsaasuuvoq hotelip allilerneranut ilanngussaqarsinnaagatta, SØMA-llu Inuiaqatigiinnut Akisussaassuseqarnermut tunngasunik (CSR) suliaqarluartarnera soqutiginaqutaaginnarpoq.
- Soorunami pingaartipparput SØMA inuiaqatigiinnut akisussaaffeqarluni ingerlammat aammalu Kalaallit Nunaanni ataatsimoortitsimmat. Isumassarsiorfiulluarsinnaavoq qanoq ililluni inuussutissarsiornermi suliniutit inunnillu sullissinermi anguniakkat pitsaasumik suleqatigiisinneqarsinnaanerinut, tamannalu aningaasanik siunnersuinermillu tunngaveqarluta tapersersorparput, taama Grønlandsbankimiit Jesper Overgaard Sørensen oqaluttuarpoq.