Umiarsuup aqumiunngorniartut sungiusarfiata Georg Stagep pituutarsuani miloriuppagit, taava inuusuttunut issimasunut imaq silarsuarlu ammaanneqassapput.

Qaffianerujussuit umiarsuup qaavanut qaartarput. Inuttaasut pisussaaffitik nalunngilaat. Aallussilluarlutik angusassamullu toraangaqarlutik mallit qaarartut pitaannarlugit isumannaatsumik umiarsualivimmut tullermut tulapput. Umiarsuup aqumiunngorniartut sungiusarfiata Georg Stagep siunertaraa, siullermeertumik inuusuttunik imarsiortutut naleqquttumik suliaqarnissamik ilinniartitsinissaq. Umiarsuaq Kommandør G. De Lichtenbergs Fondianit tapersersorneqarpoq, taassuma inuusuttunik Kalaallit Nunaanni najugaqartunik umiarsuarmi aqumiunngorniartut sungiusarfianni imarsiortutut ilinniagaqarnissamik ikiuinissaq siunertaraa. Ilinniagaqarneq aamma angalaneq ataasiakkaanut inuttut perorsarfiullunilu siunissami Kalaallit Nunaanni suliffeqarfeqarnermut iluaqutaasussaq.

Umiartornerit akeqarput aningaasaliiffigineqartariaqarlutillu

Kommandør G. De Lichtenbergs Fondiata Georg Stage aningaasatigut tapersersorpaa akiniarlugulu inuusuit akisussaaffimmik annerusumik tigusinissaq ilinniartarpaat siunissamullu imarsiorfiusumut suli sapiisernerulersarlutik. Ukiumut marloriarluni qaammatini arfinilinni umiartornerit, aningaasatigut pitsaasumik aaqqissuussinissamik pisariaqartitsipput tassanilumi tapersersuisut peqataalersarput. GrønlandsBANKEN-p inuussutissarsiornermut aningaasaateqarfiata Kommandør G. Lichtenbergs Fondia aqqutigalugu umiarsuaq aqumiunngorniartut sungiusarfiat tapersersorpaa, tamannalumi pitsaasumik siunertaqarluni taperseeqataasinnaaneq, inuussutissarsiornermut aningaasaateqarfiup siulittaasuata Kristian Lennert-p nuannaarutigaa.

- Nuanneqaarmi umiartornerni taakkunani inuusuit ineriartornerat inerinnerallu takullugu. Georg Stage-meereernerup kingorna imarsiornerup tungaatigut arlaqartut ilinniagaqalersarnerat uppernarsarsinnaavarput. Tamannalumi inuusuit angalanerminni pitsaasumik sunnerneqartarnerannut uppernarsaataavoq. Taamaattumik GrønlandsBANKEN-p inuussutissarsiornermut aningaasaateqarfiata pissusissamisoortumik Kommandør G. De Lichtenbergs Fondia tapersersorpaa, Kristian Lennert oqaaseqarpoq.

Kommandør G. De Lichtenbergs Fondiata Georg Stage aqqutigalugu inuusuit Kalaallit Nunaanneersut 250-it sinnerlugit ilinniartittarpai. Tamakku kalaallit peqataasorpassuit aamma kingunerisarpaat, naapertuuttunik aningaasassaqarnissaq matumanilu GrønlandsBANKEN-ip inuussutissarsiornermut aningaasaateqarfiata suleqatiginera tuniseqataasullu allat suliniummut pingaaruteqarluinnarput.

Kommandør G. De Lichtenbergs Fond-ata aamma Georg Stage-p akunnerminni isumaqatigiissutaata nutaap kinguneraa, siunissami kalaallit qulingiluat umiartornermut ilanngussinnaalernissaat, siuliani arfiniliusaraluartut.

Siunissami ukiumut kalaallit ilinniartut 18-it Georg Stage-mi umiarsuarmiunngornissamut periarfissaqalissapput.