GrønlandsBANKEN ukiumi kvartalini siullerni pingasuni naammagisimaarnartumik angusaqarpoq. 

2021-mi kvartalini siullerni pingasuni GrønlandsBANKEN akileraaruteqareernani kr. 114,4 mio.-inik angusaqarpoq, 2020-mi piffissami tamatumani inernerusut 94 mio.-iupput.

2020 Covid-19-ip nunarsuarmi tuniluunneranit immikkut sunnertisimaffiuvoq, qularnerulli annikilliartuaarnerani aningaaseriviup taarsigassarsiarititaani qularnaveeqqutaanilu nalinik iluarsiinernit kusanartunit kr. 7,7 mio.-inik kiisalu nalikilliliinernit killilerujussuarnit kr. 1,6 mio.-init 2021-mi inernerusut kivinneqarput.

Nalinik iluarsiinnginnermi nalikilliliinnginnermilu inernerusoq allanngunngingajappoq kr. 108,3 mio.-iulluni, 2020-mi kr. 109,1 mio.-iusoq.

GrønlandsBANKEN-ip ukiuni kingullerni taarsigassarsiarititaat qularnaveeqqusiinerilu 400 mio.-it sinnerlugit qaffariarnikuupput 5,8 mia.-inngorlutik, taamaasilluni Aningaaserivimmi pisortap, Martin Kviesgaard ineriartorneq pitsaasutut isigaa.

• Suliffeqarfiit matusinernik eqqugaajunnaarput, tamanna aningaasaqarnermut aningaasaleerusussutsimullu pitsaasumik sunniuteqarpoq. Kisiannili takornariaqarnermik, angallassinermik suliaqartut hotelillu nunarsuarmi tuniluunnermik suli eqqugaaqqapput, aasalli ukiallu ingerlanerani malunnartumik siuariartortoqarpoq.

Aningaaserivimmi pisortap erseqqissarpaa, aningaaserivik taarsigassarsititsinissaminut piareersimasoq, tamannali inuussutissarsiornermi patajaatsuunermik piumasaqaatitaqarpoq.

• Aningaasaliisarnerit naammaginartumik ingerlapput, sulili taarsigasseerusuppugut. Kalaallit Nunaata ineriartorneranut pingaaruteqarpoq, takornariaqarnermut kiisalu ineqarnernut aningaasaliisoqarnerunissaa. Peqatigitillugu nunap immikkoortuini assigiinngitsuni kiisalu aatsitassarsiornermi aallartisaasoqassaaq. Tamatumunnga piumasaqaataavoq suliffeqarfiit sinaakkutinik pilerinartunik siumullu nalunanngereersunik peqarnissaat.

Aningaasartuutit qaffakkiartorput – ineriartornermut pissusissamisoortumik ilaareersoq

IT-mut, malittarisassanik malinninnermut, kiisalu sulisunut amerlanerusunut aningaasartuutit qaffariarsimanerat naatsorsuutit takutippaat, aningaaserivimmut pisortaq naapertorlugu tamanna siunissamik ilimagisatsinnik pissuteqarpoq.

• Taakkuupput piumasaqaatit malitassagut minnerunngitsumillu aningaaserivimmik ingerlatsinissamut piumasaqaataapput. IT-mut, malittarisassanik malinninnermut minnerunngitsumillu sulisut amerlinerannut aningaasartuutit qaffariarnerat ineriartorneq pissusissamisoortuuvoq. Naatsorsornikuuarput, kisiannili soorunami eqqumaffigalugu.

GrønlandsBANKEN maannakkut 137-nik sulisoqarpoq, sulisut agguaqatigiissillugu ukiuni 8-t missaanni atorfeqartarput.

• Isumaqarpunga sulisutsinnik sulilersitsisarneq ineriartortitsinerlu iluatsilluaripput. Tamanna aningaaserivimmut suliffittut pilerinarnerulersitsivoq, sullitarpassuatsinnullu atatillugu ataqatigiinnermik patajaatsumik kiisalu sullitanut misigisanik pitsaasunik tunniussisinnaanermut qulakkeerinnilluni

Ukiumut inernerusussatut naatsorsuutigisat qaffappai

Ukiup aallartinnerani aningaaseriviup ukiumut akileraaruteqareerluni inernerusussaq kr. 115-135 mio.-iussasoq naatsorsuutigaa, kisiannili 19. oktober inernerusussatut naatsorsuutigisat qaffanneqarput 135-150 mio.-inut, 2020-mi inernerusut kr. 130,9 mio.-iusut.

• Aningaaseriviup taarsigassarsiarititaani nalinik iluarsiinerit pitsaasut kiisalu annaasaqarnerit appasittuararsuunerat naatsorsuutigisat qaffanneqarneranut pissutaapput, aningaaserivimmi pisortaq naggasiivoq

Kvartalsregnskab Q3