GrønlandsBANKEN-imi iluarisimaarneq

2023-mi ukiup sisamararterutaani siullermi aningaaseriviup akileraaruteqareernerani kr. 49,4 mio. -inik angusaqarpoq, 2022-mi kr. 26,8 mio.-nut sanilliullugu. Tunngaviusumik ingerlatsineq kr. 10,3 mio.-nik pitsanngoriarpoq kr. 48,5 mio.-nut, 2022-mi obligationillu nalingisa appasissimaneri peqqutigalugu kr. 10,7 mio.-nit annaasat 2023-mi kr. 7,9 mio.-nik iluanaaruteqarput. Annaasat nalikilliliinerillu aningaaseriviup taarsigassarsiaqartinerani kr. 7 mio.-nut qaffariarput 2022-mut kvartal siullermi kr. 0,7 mio.-llutik. 

GrønlandsBANKEN-imi ukiup sisamararterutaani siullermi taarsigassarsiarititat qularnaveeqqusiinerillu kr. 45 mio.-nik amerleriarput kr. 4.399 mio.-nut taavalu Nationalbankenip ernianik qaffaanerani sunniuteqaqataalluni.   

• Ukioq aallartilluarpoq. Taarsigassarsisitsineq siuariartorpoq isertitanullu sunniuteqarluni. Qaammatit 15-ni taarsigassarsisitsineq kr. 600 mio.-nit sinnerlugit amerleriarput tamannalu siuariarnermi malunnarluni. Tamannalu takutippaa Kalaallit Nunaanni inuussutissarsiornerup tungaatigut aningaasaliisoqarluarsimasoq, isumaqartipparalu unammillersinnaasugut, oqarpoq aningaaserivimmi pisortaq Martin Kviesgaard.

Grønlandsbanken-ip erniat qaffakkiartornera, aningaasallu naleerukkiartorneranut annerusumik unammillernartumik malugisaqanngilaq.

• Kalaallit Nunaanni realkreditimik taarsigassarsiat erniaasa qaffassimanerat malugineqarsinnaavoq, ininilli piginnittut aalajangersimasunik erniaqartinneqarnermikkut illersugaalluarput, taamaammat pingaarnertut siullermeerlutik inissiamik pisisimasunut sunniuteqarput. Akerlianilu sullitagut annerusumik aningaaserivimmiititallit pitsaasumik erniaqalerput.
• Atuinermi malugineqarpoq akit qaffakkiartorneri aamma sanaartornermi. Nukissiutit akii ukiup naaneraniit akitsornissaat naatsorsuutigineqassaaq, sullitagullu naatsorsuutigissavaat inuuniarnermi akileraarutit qaffannissaat piareersimaffigissagaat. Kingunera nunani allani sanilliullugu annertutiginavianngilaq.

Aningaaseriviup pisortaata inuiaqatigiinni ineriartornissamut periarfissaqartoq oqaatigaa.

• Takornariaqarnermut tunngasut aallartilluarnikuupput taavalu aalisarnermi, aatsitassalerinermi aamma siunissami ilinniarnermi siuariarnerup kingunerisaanik periarfissat angugaanni inuiaqatigiinni ineriartorneq qajannaatsoq ukiuni qaninnerni anguneqarsinnaavoq. Grønlandsbanken-miit Kalaallit Nunaat ineriartorluarnissaa anguniarlugu tamakkiisumik iliuuseqaqataarusuppugut.

Aningaasartuutit amerlipput

Ukiumi sisamararterutaani siullermi naatsorsuutini aningaasartuutit kr. 56,9 mio.-nut amerlipput.  

• Aningaasartuutit amerlineranut sulisut amerleriarneri, IT, compliance (inatsisit malinneri) aamma ilinniarnermut aningaasartuuteqarneruneq peqqutaapput, taavalu ukioq kingullermmiit sanilliullugu illoqarfiit sinerianiittut tikinnerusaleratsigit. Tamanna pitsaaqaaq aamma suli sulisunut IT-mullu suli aningasaliissaagut pitsaasumik siunnersuineq anguniassagatsigu aamma sullitarpassuatsinnut IT tungaatigut aaqqiissutit atorniassagamik. Isertitalli malinnaalluarput, taamaammat ajunngitsutut nalilerparput.

Nalikilliliinerit annaasallu annikitsut

Grønlandsbanken-ip taarsigassarsiarititaanut annaasai nalikilliliinerillu kr. 7 mio.-pput, ukioq siulianut sanillullugit qaffassimallutik 2022-mi piffissami tassani kr. 0,7 mio.-llutik.   

• Kvartalimiit kvartalimut allanngorarput. 2020-mi ukiup sisamarerterutaani siullermi nalikilliliinerit 9,2 mio.-pput ukiullu sinnera annikillutik. Nalikilliliinerit suli appasipput tamannalu inuussutissarsiortut aamma inuinnaat aningaaserivimmi taarsigassarsiaqartut akornanni qajannaatsumik inissisimanermik takussutissiilluni. Ukiup sinnera annikinnissai naatsorsuutigaarput.

Ineriartornissamut inissaqartitsineq

Aningaasaatit procentiat 23%-iuvoq taamaasillunilu akiliisinnaanissamullu pisariaqartut naatsorsorneqartut 11,1%-iusut ilorrisimaarnartumik qaangeqqallugit.   

• Kalaallit Nunaanni qajannaatsumik aningaaseriveqarnissaq pingaaruteqartoq, peqatigitillugulu ineriartorneroqqinnissamut suli inissaqassaaq, taama oqarpoq Martin Kviesgaard.

GrønlandsBANKEN-ip 2023-mut naatsorsuutigisaat apriilip 24-iani qaffanneqarput akileraartinnani kr. 145-185 mio.-nut missaaniissasut 2022-mi 109,1 mio.-pput.