MISISSUINERIT KINGULLIIT TAKUTIPPAAT TAKORNARIAT
NUNANIT ALLANEERSUT QANOQ NALEQARTIGINERI

Takornariat nunanit allaneersut nunatsinni inuussutissarsiornikkut ukiuni kingullerni
annertusiartuinnartumik inissisimalerput. Tamanna ilutigalugu paasissutissat tutsuiginartut
pisariaqartilluinnarneqarput inuussutissarsiutip aningaasaqarneratigut piujuartitsisumillu
ineriatortissinnaaneranut tunuliaqutsiisinnaaneq anguniarlugu.

2023-mi aasaagaa takornariaqarnermut suliaqartut aammalu inuiaqatigiinni suliaqartut
pingaaruteqartut arfineq pingasut kattullutik ataatsimoorlutik takornariaqarnerup aningaasatigut
piujuartitsinermillu ingerlatsinerup inuiaqatigiinnut sunniutai pillugit misissuillutik paasissutissanik
katerseqatigiipput. Suleqataasut tassaapput Air Greenland, Kalaallit Airports, Grønlandsbanken,
Grønlandsbankens Erhvervsfond, Nalik Ventures, AECO - Association of Arctic Expedition Cruise
Operators, Sikuki Nuuk Harbour aamma Visit Greenland.

Suleqatigiit nalilerpaat siunissami pingaarnersiuinermi pitsaasumik aaliangiisoqartinnagu
aningaasaliisarneq aammalu pilersaarusiortarneq pillugu paasisimasaqarluarnissaq
pisariaqarluinnartuusoq. Tamanna politikkikkut aaliangiiniarnermi aammalu suliffeqarfinni
aaliangiiniarnermi atuuppoq. Mittarfissuartaalernermi aammalu takornariaqarneq pillugu periusissiap
nutaap takkutilernerani ataatsimoorlutik akisussaaffik tigujumasimavaat Kalaallit Nunaanni
takornariaqarnikkut piujuartitsineq tunngavigalugu ingerlatsisinnaaneq pillugu annerusumik
ilisimasaqarnermik tunngaveqartumik sinaakkusiiniarnermi.

“Nunanit allaniit takornariat tikittartut inuiaqatigiinnut aningaasatigut pingaaruteqartumik
isertitsissutaalluartarnerat sunniutaalu pillugit paasisimasaqarneq siunissami aaliangiisarnissamut
aningaasaliisarnissamullu pingaaruteqarluinnartuvoq. Ilanngullugu pingaartuteqarluinnartuuvoq
tamatta ataatsimut takornariaqarnerup Kalaallit Nunaannut aningaasatigut qanoq iluaqutaatiginera
paasisimassallutigu taamaasilluta takornariaqarnerup qanoq pingaaruteqartigisumik inissisimanissaa
aammalu takornariaqarnerup siunissami qanoq pingaartinneqartiginissaanut
paaseqatigiissuteqarsinnaaqqulluta. Paasisimasat saqqummiunneratigut tamattatta kissaatigaarput
ilisimalersimasat tunngavigalugit takornariaqarnerup oqallisiginissaa aammalu ataqqillugu
takornariaqarneq tassaasoq inuiaqatigiinnut aningaasatigut annertuumik pingaaruteqartumik
inissisimasoq. “ Visit Greenlandip pisortaa Anne Nivíka Grødem oqarpoq.

Misissuinermit kisitsisit pingaarnerit takutippaat:
Takornariat nunat allaneersut 2023-mi takornariaqarnermi Kalaallit Nunaanni aningaasatigut kaaviiaartitani
1,9 mia Dkk-nik isertitsissutaasut
Takornariat nunat allaneerut ima annertutigisumik isertitsissutaasimapput akileraarusiinnginnermi isertitat
1,2 mia Dkk, akileraarutit 48 mio. dkk aammalu akitsuutit 87 mio. Dkk 2023-miinnaq.

Takornariat nunanit allaneersut toqqaannartumik inunnut 1.075-nut suliffissaqartitsipput.
Misissuinerup inernera kikkunnit tamanit uani takuneqarsinnaavoq tourism.stat.gl
Suleqatigiinneq pillugu paasisaqarnerorusukkuit Visit Greenlandip pisortaa Anne Nivíka Grødem uani
attavigisinnaavat: nivika@visitgreenland.com, tlf. +299 56 02 82