GrønlandsBANKEN kvartalip aappaani kr. 39 mio.-nik sinneqartooruteqarnermini neriulluarpoq

Kvartali siullermi COVID-19 peqqutigalugu nunatsinni aningaasatigut nalorninartoqartitsivoq. Kvartalip aappaani akiligassarsiniarnermi- aamma nioqquteqarfimmi navianarsinnaasut allanngorput, kvartalillu aappaani niuernerup tungaatigut siuariartornera takussutissartaqarluni.

GrønlandsBANKEN 2020-mi ukiup affaani siullermi kr. 55,7 mio.-nik angusaqarpoq, 2019-imi ukiup affaa siullermi kr. 69,4 mio.-nut sanilliullugit. Nalinik nalimmassaanerit aamma appartitsinerit kr. 72,9 mio.-pput ukiorlu ataaseq sioqqullugu kr. 71,6 mio.-llutik.

Naak martsimi aprilimilu pisoqarpallaanngikkaluartoq isertitat maannakkut aalajaapput, aningaasartuutit atorunnaarsitsinerillu 2019-mut sanilliullugit tamakkiusumik appalaarput. Pappiliat aningaasanik nalillit nalianut nalimmassaanerit takutippaat kvartalip aappaani iluanaaruteqareerluni kr. 7,3 mio.-nik annaasaqartoq.

- Kvartalip aappaani kr. 39 mio.-nik sinneqartooruteqarluni, kvartalilu siullermi kr. 16 mio.-nik sinneqartooruteqarnikuulluni, aningaasat taarsigassaqartitsinerit kr. 100 mio.-nik missaani amerleriarmata isumaqarpunga neriulluarsinnaasugut, aningaaserivimmi pisortaq Martin Kviesgaard-ip oqaatigaa.

- Sulisugut ulapinnikuupput, upernaamilu annaasaqarnissamut nalilersukkat ilimagisatsinniit ajorpallaanngillat, sullitagullu qaammatit siullerni COVID-19 qaangerluarsimavaat, Martin Kviesgaard oqarpoq.

Aningaasanik taarsigassiisarnerit 2018-imi aamma 2019-imi amerleriarlutik 2020-mi kvartali siullermi ikileriarput, kvartalimilu aappaani kr. 3,7 mia.-nut amerleriaqqillutik. Aningaaseriviup nalilerpaa ineriartorneq naammaginartuusoq, eqqarsaatigissagaanni COVID-19 nunatsinni qanoq nalorninartorsiortitsinikuutigisoq.

- Ikiorsiissutit nersualaartariaqarput, ingammik takornariartulerisunut nakkartut. Piaartumik iliuuseqartoqartariaqarsimavoq, isumaqarpungalu taamaaliortoqarsimasoq. Iluaqutaarpasipput. Ilimanarpoq inuussutissarsiortoqassasoq suli ikiugassaassunik, kisiat tamakkiisumik ikiorsiissutit isigalugit sunniuteqarluarput. Suliffeqarfiillu ingerlalluartut amerlaqaat, tamannalu suliffissaqarluartitsivoq aningaasaqarnermullu ingerlatitsilluarluni.

Siunissaq eqqarsaatigalugu

GrønlandsBANKEN-imi pisortaq 2021 eqqarsaatigilerpaa.

- Eqqarsaatigineqartariaqarpoq ikiorsiissutit atuutinneri 2021-mut sivitsorneqassanersut. Piareersimaffigisariaqarparput ukioq ataaseq-marluk ingerlanerani aatsaat nalinginnaasunngornissaq ilimanarsinnaasoq, takornarialerisullu, akunnittarfiit aamma angallasisut piffissami tassani ikiorneqarnissaat suliniutit pisariaqartinneqassapput, Martin Kviesgaard-ip nalilerpaa.

GrønlandsBANKEN-ip nunatsinni tunillaassuuttoqarnissaq peqqutigalugu matugallarnissaq, piffissanilu ilaanni aningaaseriviup sullitaanut tamanna sunniuteqarnissaa piareersaatigivaat.

Ukiumut naatsorsuutigisat qaffanneqarnikuupput

Ukiup affaani nalikillisitsinerit qaffapput tamakkerlugit kr. 9,8 mio.-iupput, ukiumut kingullermut sanilliullugit kr. 4,8 mio.-iullutik, tamannalu nalikillisiinernut kvartalip aappaani taamallaat kr. 0,6 mio.-iupput kvartalimilu siullermi kr. 9,1 mio.-iullutik.

Aningaaseriviup niuernermi peqataanera COVID-19-imiit qanoq sunnerneqarsimanersoq misissorpaa. Nalikillisikkiartuaartitsinerit inuussutissarsiortunut aaliangersimasunut COVID-19 peqqutigalugu aarlerinarsinnaasunut tunngasut katillugit kr. 20 mio. missaaniipput.

Aningaasaatit procentii 23,3 %-iupput tamannlu akiliisinnaanissamut pisariaqartitsineq 11,6 %-iusoq iluarisimaarnartumik qaangerlugu inissisimalluni.

Fondsbørs-imut nalunaarummi 27. juli 2020-meersumi ukiumut naatsorsuutigaat kr. 80-120 mio. missaani akileraarutit akilernagit inerneqassalluni nalunaarutiginikuusaq kr. 100-120 mio.-nit missaani allanngortinneqarnikuuvoq tamannalu taamaaginnarpoq.