Arnanut aallartisaasunut unnussiuaartitsinermik suna siunertaava?

”Aaqqissuussinermut tunngaviusoq ataatsimut isigalugu tassaavoq, uagut aningaaserivittut inuiaqatigiinni ineriartornermut qitiusutut nukittut atorusunnerput. Attaveqatigiinnermut oqaluttarfipput immikkut ittoq avatangiisit tamaasa suleqatigalugit atorsinnaavarput, taamaasillutalu inuussutissarsiornermi nalilinnik pilersitseqataasinnaalluta, taamaaliornikkullu Kalaallit Nunaanni aningaasaqarnikkut atasinnaasumillu ineriartornermik siuarsaaqataalluta” taama oqarpoq Inuussutissarsiornermi siunnersorti Anders Dessau GrønlandsBANKEN-imeersoq nangillunilu:

”Aamma kissaatigaarput takkuttut attaveqaatitaarnissaat, kingornalu ilassutitut Facebook-ikkut gruppemik pilersitsisoqarpoq ´Kvindelig iværksætteri´.”

Aallartisaaneq sooq inuiaqatigiinnut pingaaruteqarpa?

”Aallartisaaneq aamma suliffeqarfiit aallartinneqaqqammersut ineriartortitsisarput, naammassisaqartitsisarput nutaaliortitsisarlutillu. Neriunarpoq siunissami suliffeqarfinngussasut. Suliffeqarfiimmi tamarmik mikisuunikuupput.”

Aaqqissuussaq qanoq soqutigineqartigaa?

”Aaqqissuussaq ulikkaaqqavoq, arlallillu utaqqisuniipput, tamatuma suliaqarfimmi piumasaqarneq soqutiginninnerlu uppernarsarpaa. Aaqqissuussinermi ammasumik oqallilluartoqarpoq pimoorussisoqarlunilu. Peqataasut imminnut kajumissaarput kiisalu siunnersuutinik, ilassutinik misilittakkanillu avitseqatigiilluarlutik.”

Sooq arnat aallartisaasut?

”Arnat aallartisaasut arlalitsigut pingaaruteqarput. Angutit arnallu imaluunniit ikinnerussuteqartut allat akornanni unamminerunngilaq. Siullertut assigiinngiaarneq pingaaruteqarpoq, tamani nalimik pilersitsisarmat. Assigiinngiiaarnerugutta, nutaaliornerugutta iluatsilluarnerugutta inuiaqatigiittut angusarissaarnerussaagut.

Arnat amerlanertigut angutinit allaanerusumik eqqarsartariaaseqarput kiisalu allatigut kajumilersarlutik. Immaqa allanik naleqartitaqarput soqutigisaqarlutillu. Ullumikkut eqqarsaatigissagaanni, arnat aallartisaanermut atatillugu ikinnerugaatsiarput. Ullumikkut aallartisaasut 1/3-sa missaat arnaapput, kiisalu aalisarnermik piniarnermillu inuussutissarsiut ilanngutissagutsigu 1/6-sa missaaniillutik.”

Arnat aallartisaanermi qanoq angutinit allaanerussuteqarsinnaanersut misigaajuk?

”Misigisarpara arnat: piareersarluarsimanerusartut, peqqissaartuusut kiisalu siuarsimakkajullutik. Tamatuma saniatigut niuernermut aamma missingersuutinik suliaqarnermut atatillugu piviusorsiortuupput, kiisalu nalinginnaasumik aarlerinaatinik tigusaqannginnerusarlutik. Tamakku tamarmik aallartisaasutut suliffeqarfimmillu piginnittutut pingaaruteqarluinnarput. Taamaattumik kissaatigilluinnarparput arnat amerlanerusut aallartisaasalissasut.”

Arnat aallartisaasartut ikinnerunerannut suna tunngavittuut misigisarpiuk?

”Unammillernartut ilaat tusagakkakka, arnat aallartisaasarnerup iluani sooq ikinnerunersut, ilaatigut tassaapput arnat namminneq piginnaasatik qularinerusarmatigit nalornissutiginerusarlugillu. Tamatuma saniatigut arnat aamma toqqissisimanermik ujartuinerusarput, tamannalu sulisartuunermut akissarsiaqartuunermut assersuullugu unammillernartuuvoq. Aallartisaaneq nalorninarnerusutut isigineqartarpoq, tamannali piareersarluarnerunikkut il.il. annikillisarneqarsinnaavoq. Ass. akissarsialittut sulinerup saniatigut aliikkutaralugu sammisanik aallartitsinikkut” Anders Dessau naggasiivoq.

Unnummiit assit aningaaseriviup Facebookiani, Instagramianilu takuneqarsinnaapput.