GrønlandsBANKEN-ip ullumikkut 2023-mut ukiumoortumik nalunaarutini saqqummiuppaa. Aningaaseriviup suli akileraaruteqarnani inernerusut kr. 244,6 mio.-it anguai, 2022-mi kr. 109,1 mio.-it angunikuullugit, tamanna januar 2024-mi kukkunersiukkamik missingersuutaasa nalingaat.

2023-mut ukiumut naatsorsuusiorfiusumut inernerusut taamaasillutik annertuumik qaffariarsimapput, aningaaseriviup niuernermi suliaqarfiinik pingaarnernik arlalinnik ineriartorfiusumik, kiisalu naliusunik iluarsiinernit positiviusunik ingerlanneqartumik.

Aningaaserivimmi pisortaq, Martin Kviesgaard oqarpoq: "Nalunanngilaq, positivimik ineriartorneq aningaasarsiutigigipput. Aammaarluta aningaasarpassuarnik taarsigasseeqqippugut, taamaasilluta aaqqissuussamik inississuineq iluaqutigalugu. Peqatigitillugu naliusunit iluarsiinerit obligationinit annertuunit pigisatsinneersut eqqortumik inissisimapput kiisalu uatsitulli 3 mia. sinnerlugit nationalbankenimiittuuteqaraanni imaluunniit obligationini aningaasaliisimagaanni erniat qaffasissumik inissisimanerat iluaqutaavoq. Soorunami nalaatsulaarpoq seqineq, qaammat ullorissallu eqqorluartumik inissisimanerat, aammali tamanna inernerusuni ersersinneqarpoq."

Tunngaviusumik ingerlatsineq pitsanngoriartoq
Aningaaserivimmi tunngaviusumik ingerlatsineq malunnartumik pitsanngoriarpoq 2022-mi kr. 153 mio.-init 2023-mi kr. 218,7 mio.-inut. Taarsigassarsiarititat 459 mio. kr.-inik qaffariarput, maannalu kr. 4.813 mio.-iullutik, tamannalu aningaaseriviup oqaluttuarisaanerani aatsaat taama qaffasitsigaaq.

“Tulluusimaarutigaarput taarsigassarsiarititat 2022-mi aamma 2023-mi katillugit 1 mia.-inik taama qaffatsigisimammata. Tamatumunnga pissutaavoq inuussutissarsiornermi aningaasaliinerit, uagut aningaaserivittut tapersersorsinnaasimasagut ingerlalluarsimammata. Tamannalu aamma soorunami isumaqarpoq aningaaserivimmi ulapaarluinnarsimanitsinnik.” Martin Kviesgaard taama oqarpoq.

2023-mi ilanngaateqareerluni ernianit isertitat 36 %-imik qaffariarput kr. 329,7 mio.-inngorlutik. Isertitat taarsigassarsiat, nationalbankenimut aningaasaliissutit aamma obligationit qaffanneraneerput. Aningaaseriviup sullitaanut aningaaserivimmiittuuteqartunut erniat aamma 2023-mi annertuumik qaffapput, taamaannerani akiliutinit aamma akissarsianit isertitat appariarput, ilaatigut qularnaveeqqutit appariarnerisa kingunerisaanik.

Aningaasartuutit qiviarutsigit aamma qaffariartoqarpoq, tamatumunnga pingaartumik pissutaavoq sulisut amerlanerulernerat aamma ilinniarnermut, IT-mut kiisalu suliffeqarfimmik nukittorsaanermut annertuumik aningaasaliissuteqarneq.

Aningaaserivik malunnartumik naliusunit iluanaaruteqarnermik misigisaqarpoq, pingaartumik obligationinit, taakku 2023-mi katillugit naliusunit iluanaarutinik kr. 40,1 mio.-iusunik tapiissuteqarput, 2022-mi posti taanna minus kr. 39, 4 mio.-imiippoq. Aningaaseriviup sullitanut taarsigassarsianit annaasai aamma nalikilliliineri kr. 14,2 mio.-iupput, 2022-mi kr. 4,5 mio.-iusut.

Aktiaatilinnut iluanaarutit aamma nunatta karsianut akileraarutitigut akiliinerit annertuut

Inernerusut aatsaat taama annertutigisut aningaaserivimmi aktiamut 55 kr.-inik iluanaaruteqartoqarnissaanik siunnersuuteqarfiuvoq, ukiup siuliani aktiamut 20 koruuninik iluanaaruteqartitsiffiusoq. Aningaaserivimmi aktiaatillit annerpaat marluk tassaapput Nunafonden aamma Nalik Ventures A/S. Aktiaatillilli kisimik sinneqartoorutinik iluanaaruteqassanngillat. Grønlandsbanken 2023-mi iluanaarutinit akileraarutinik, ingerlatseqatigiiffinnut akileraarutinik aamma akileraarutinik A-nik 130 mio.-it missaanniittunik akileraaruteqarpoq.

2024-mi appasinnerusumik sammisaqarnissaq ilimasaarutaavoq
Peqatigitillugu GrønlandsBANKEN-ip naatsorsuutigaa 2024-mi aningaaserivimmi niuernermi pitsaasumik ineriartortoqaannarnissaa, aningaasarsiornikkut pissutsit ingasanngitsumik ineriartoraluartut kiisalu BNP annikitsuinnarmik qaffariarnissaa naatsorsuutigineqaraluartoq. Taamaasilluni aningaaseriviup eqqumaffigaa, aalisarnermi, sanaartornermi aamma inissianik tuniniaanermi sammisat appasinnerunissaat periarfissaasoq.

Assiliarli tamanna tupaallannartuunngilaq. ”Sanaartorneq ernianit qaffasissunit eqqorneqarpoq, taamaattumillu 2024-mi unikaallattoqassagunarpoq. Taarsiullugu mittarfiit sananeqarlutik naammasseqqajaalerput, tassanilu naatsorsuutigaarput tamatuma kingunerisaanik namminersortut aningaasaliisarnissaat. Kalaallit Nunaanni ukiuni kingullerni aningaasat naleerukkiartornerannut illersugaalluarsimavugut tamannalu pitsaalluinnarsimavoq, kisiannili soorunami eqqumaffigaarput aningaasat naleerukkiartornerata 2024-mi qaffarialaarnissaa naatsorsuutigineqartariaqarmat. Tamatuma kingunerisaanik naatsorsuutigaarput aningaasat naleerukkiartornerat appariaqqissasoq, erniat aamma appariaqqinnissaat ilimanaateqarsinnaalluni.” aningaaserivimmi pisortaq taama naggasiivoq.

Aningaaseriviup 2023-mut sanilliullugu naatsorsuutigaa, 2024-mi akileraaruteqareernani inernerusut appasinnerulaarlutik 180-230 mio.-iussasut.