GrønlandsBANKEN 2023-mi qajannaatsumik siuariartorpoq

GrønlandsBANKEN-ip 2023-mi qaammatinut siullernut qulingiluanut naatsorsuutini saqqummiuppai, suli akileraaruteqannginnermi inernerusut kr. 170,8 mio.-iullutik. 2022-mi piffissami tassani 65,2 mio.-inik sinneqartoorfiuvoq, taamani aningaaserivik nalit allanngorarneranni annaasaqarnermik eqqugaaqqavoq, erniat qaffakkiartuinnartut pissutigalugit.

Ukiumi matumani qaammatini qulingiluani siullerni aningaaserivik nalit allanngorarneranni annaasaqanngilaq, maannalu 19,8 mio.-inik iluanaaruteqarluni, kisianni ilanngaaseereerluni ernianit isertitat, siuariartornermut pissutit pingaarnerpaapput. Taarsigassarsiarititat aamma aningaaserivimmiittuutit qaffakkiartortut kiisalu erniat qaffasinnerat aningaaseriviup inerneranut pitsaasumik sunniuteqarput, akiliutinit isertitat appariartortut.

Aningaaserivimmi pisortaq, Martin Kviesgaard oqarpoq: "Nuannaarutigaarput takusinnaagatsigu ineriartorneq nukittooq pitsaasorlu, pissutsit assigiinngitsorpassuit inernerisaat. Siuariartornermut taama atsigisumut piumasaqaataavoq, ukioq manna sorpassuit eqqortumut ingerlasimanerat. Erniat qaffakkiartortut iluaqutaapput, obligationit kiisalu aningaaserivimmiittuutit 2,8 mia.-it nationalbankimiittuutigigatsigit.”

Aningaaseriviup taarsigassarsiarititat ukiumi ataatsimi 570 mio.-inik qaffassimapput, maannakkullu september 2023-p naanerani kr. 4.672 mio.-iullutik, aningaaseriviup ataatsimut niuernermi annertussusaa maannakkut kr. 15 mia.-inik annertutigivoq. Kalaallit Nunaanni aningaasaqarnikkut siuariartorneq pitsaasumik ineriartornermut sunniuteqaqataasimavoq.

Martin Kviesgaard ilassusiivoq: "Nuannerpoq sulisutta sulilluarnerujussuat aamma ersarissumik inerneqartoq, aamma taarsigassarsiarititat ineriartornerat tulluusimaarutigilluinnarparput. Pitsaalluinnarpoq, Kalaallit Nunaanni suliffeqarfiinnaanngitsut aammali ilaqutariit periarfissaat ineriartortitseqataaffigisinnaagatsigit. Tamatuma takutippaa, unammillersinnaalluarsimasugut, kisiannili pingaarnerpaamik, Kalaallit Nunaanni suliffeqarfippassuit siunissamut ersarissumik aningaasaliisartut, periarfissat nutaat ilaatigut erseriartormata, attaveqatigiinnermut aningaasaliinernut annertuunut atatillugu."

GrønlandsBANKEN 2023-mut akileraaruseqareernani inernerusussatut naatsorsuutini qaffaqqammerpai, kr. 170-210 mio.-init kr. 200-230 mio.-inut, taanna aalajangiusimaneqassaaq.