Ukiuni tulliuttuni Nuummi, Ilulissani Qaqortumilu mittarfiit pingasut nutaat atuutilertussaapput, nunatsinni inuussutissarsiornikkut nutaanik periarfissanik malitseqartussatut naatsorsuutigineqartut.

Kisiannili mittarfiit nutaat periarfissanik pilersitsineri atorluassagutsigit inuussutissarsiornikkut ineriartortitsineq siammarnerusariaqarparput, mittarfiit taakku inissisimaffini illoqarfiit kisimik pinnagit.

Taamaattumik Sulisitsisut aamma GrønlandsBANKEN Kalaallit Airports ilaatigut suleqatigalugit sammisaqartitsinissamut aaqqissuussaqarput, sineriammi inuussutissarsiornikkut ingerlataqartut katersornissaanik siunertalimmik, piffinni siuariartornissamut periarfissanik isumassarsiorfissatut.

Upernaaq 2023 Nuummi, Maniitsumi, Qaqortumi, Sisimiuni, Aasianni aammalu Ilulissani sammisaqartitsinerit ingerlasimapput. Maanna aaqqissuussinernik malitseqarteqqinniarparput, kingullermiillu susoqarsimaneranik pissangalluta maanna takusussanngorparput.

Sammisaqartitsinerit siulliit pisussat Nuummi februarip 13-iani aamma Maniitsumi februarip 15-iani. 

Nuummi mittarfik nutaaq illoqarfik pingaanersami inuussutissarsiornikkut nikeriartitserujussuartussaavoq, aammalu periarfissanut nutaanut ammaasussaalluni soorlu takornariaqarnikkut, assartuussinikkut aammalu angallassinikkut. Maniitsoq ilaatigut Nuummi mittarfeqalernerasigut annertuumik siuarsaanissamut periarfissatsiaqalertussaavoq. Angallammik akunnialunnguit angalagaanni takusassarpassuarnut apuuttussaapput, ilaatigut misigisassaqartitinermut tunngasuni.

/ Grønlandsbanken & Grønlands Erhverv - Sulisitsisut